ގުޅީފަޅުން ގޯތި ލިބޭ ފަރާތްތަކަށް ބިން ކަނޑައެޅުމަށްޓަކައި އަންނަ އަންގާރަ ދުވަހުގެ ހެނދުނު 9:00 ގައި ދަރުބާރުގޭ ރަންނަބަނޑޭރި މާލަމުގައި ގުރުއަތުލުމެއް ބޭއްވުމަށް ވަނީ ހަމަޖެހިފައިވާކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާބެހޭ ވުޒާރާއިން އިއުލާނު ކޮށްފިއެވެ. މި ގުރުއަތުލުން ޕަބްލިކް ސަރވިސް މީޑިއާއިން ލައިވްކޮށް ދައްކާނެ ކަމަށްވެސް އެ ވުޒާރާއިން ވަނީ ހާމަކޮށްފައެވެ.
"ގުޅީފަޅުގެ ލޭންޑް ޔޫސް ޕްލޭން" އަށް ގެނެވުނު ބަދަލާ ގުޅިގެން، ބިންވެރިޔާ ސްކީމްގެ ދަށުން ކުރިން ގުޅީފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ވަނީ ބަދަލުވެފައެވެ. މި ގުރުއަތުލުމުގައި މިހާތަނަށް ޕްލޮޓް ހަވާލުކޮށްފައިވާ ފަރާތްތަކާއި، ޕްލޮޓް ހަވާލުނުކުރެވި ތިބި ފަރާތްތަކާއި، ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލުކުރި ފަރާތްތަކުގެ ގުރުއަތުލުން ހިމެނޭނެއެވެ.
ގުޅީފަޅުން ޖުމްލަ 3,520 ގޯތި ދޫކުރެވޭއިރު، މީގެ ތެރޭގައި 1,250 އަކަފޫޓުގެ 669 ގޯއްޗާއި، 1,650 އަކަފޫޓުގެ 1,234 ގޯއްޗާއި، 2,050 އަކަފޫޓުގެ 916 ގޯއްޗާއި، 2,450 އަކަފޫޓުގެ 473 ގޯއްޗާއި، 2,850 އަކަފޫޓުގެ 158 ގޯއްޗާއި، 3,250 އަކަފޫޓުގެ 49 ގޯއްޗާއި، އަދި 3,650 އަކަފޫޓުގެ 21 ގޯތި ހިމެނެއެވެ.
ގުރުއަތުލުން ކުރިއަށްދާނީ ގެދޮރުވެރިކަމާބެހޭ ވުޒާރާއިން އެކުލަވާލާފައިވާ ލިސްޓުގައިވާ ތަރުތީބުންނެވެ. ގުރުއަތުލުމަށް ޙާޟިރުވާ ފަރާތަކީ ބިން ލިބޭ ފަރާތް ނޫން އެހެން މީހެއްނަމަ، ބިން ލިބޭ ފަރާތުގެ އިއުތިރާޒެއް ނެތްކަމުގެ ލިޔުމަކާއި އައިޑީ ކާޑުގެ ކޮޕީއެއް ހުށަހަޅަންޖެހޭނެއެވެ. ގުރުއަތުލުން ނިމުމުން، ގޯތިތަކުގެ ރަޖިސްޓްރީއާއި އެއްބަސްވުންތަކާ ގުޅޭ މައުލޫމާތު ފަހުން ހިއްސާކުރާނެ ކަމަށް އެ ވުޒާރާއިން ވަނީ އިއުލާނުކުރައްވާފައެވެ.
