ވިލިމާލެ ރައްޔިތުންނަށް ދިމާވާ ސިއްހީ ކުއްލި ހާލަތްތަކުގައި ބަލިމީހުން މާލެ ގެނައުމަށް ޚާއްސަކޮށްފައިވާ ސީއެމްބިއުލާންސުން މިހާތަނަށް 133 ދަތުރު ކޮށްފައިވާކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ ޢަބްދުއްރައްޒާޤް ޙަލީމް ވިދާޅުވެއްޖެއެވެ. އޭނާ މިހެން ވިދާޅުވީ ފާއިތުވި ހަފްތާގައި ބޭއްވި ނޫސްވެރިންގެ ބައްދަލުވުމުގައެވެ.
ޢަބްދުއްރައްޒާޤް ޙަލީމް ވިދާޅުވިގޮތުގައި ކުރިން ވިލިމާލެއިން ބަލިމީހުން މާލެ ގެނައުމަކީ ވަރަށް ބޮޑު ތަކުލީފަކަށް ވެފައިވީ ނަމަވެސް، ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން މާލެއާއި ވިލިމާލެއާ ދެމެދު ދަތުރުކުރުމަށް ސީއެމްބިއުލާންސެއް އޮޕަރޭޓްކުރަން ފެށުމާ ގުޅިގެން ބަލިމީހުން މާލެ ގެނެސް ގެންދިޔުމުގައި ފަސޭހަތަކެއް ލިބިފައިވެއެވެ.
ވިލިމާލެ ހޮސްޕިޓަލާ ހަވާލުކޮށްގެން އޮޕަރޭޓްކުރާ މި އެމްބިއުލާންސްގެ ޚިދުމަތް ފެށިފައިވަނީ މާލެއާއި ވިލިމާލެއާ ދެމެދު އަޅާ ބުރިޖު އެޅުމުގެ ކުރިން، ބަލިމީހުން އުފުލުމަށް ދިމާވާ ދަތިތައް ހައްލުކުރުމަށްޓަކައި މި އަހަރުގެ ޖެނުއަރީ މަހުގެ ތެރޭގައި ސޮއިކޮށްގެންނެވެ.
