މާލޭގައި، ބިދޭސީއަކު އޮރިޔާންކޮށް، ކަރުގައި ވަޅި ޖައްސައިގެން ފޭރުމުގެ މައްސަލައެއްގައި އައްޑޫ ސިޓީ ހިތަދޫއަށް ނިސްބަތްވާ 35 އަހަރުގެ ފިރިހެނަކު ފުލުހުން ހައްޔަރުކޮށްފިއެވެ. މި މަހުގެ 23 ވަނަ ދުވަހު ކްރިމިނަލް ކޯޓުން އޭނާގެ ބަންދަށް 15 ދުވަސް ޖަހާފައިވާއިރު، ތުހުމަތު ކުރެވޭ މިންވަރަށް ހެކި ހުށަހަޅާފައިވާކަން ބަންދު އަމުރުގައި ފާހަގަކޮށްފައިވެއެވެ.
ވައްކަމާއި ފޭރުމުގެ ރެކޯޑްތަކެއް އޮތް މި މީހާ އިތުރު މީހަކާ އެކު ބިދޭސީއަކު ބަރަހަނާކޮށް ފޭރުނު ކަމުގެ މައުލޫމާތު ލިބުމާ ގުޅިގެން، ފުލުހުން އެ ސަރަހައްދަށް ގޮސްފައިވެއެވެ. އެ ދެ މީހުން ވަނީ ބިދޭސީ މީހާ ގެއަކަށް ވައްދައި، އަތާއި ފައި ބަނދެ، އޮރިޔާންކުރުމަށްފަހު ކަރުގައި ވަޅި ޖައްސައި ފޭރިގަނެފައެވެ. މި ހާދިސާގައި އެ ބިދޭސީ މީހާގެ ޖީބުގައި އޮތް ވޮލެޓް ގެންގޮސްފައިވާކަމަށް މައުލޫމާތު ދީފައިވާއިރު، އޭގައި 10،600 ރުފިޔާގެ ނަގުދު ފައިސާއާއި، ކާޑާއި އެހެނިހެން ޑޮކިއުމެންޓްތައް ހުރިކަމަށް އޭނާ ބުނެފައިވެއެވެ.
މި ހާދިސާގައި ބިދޭސީމީހާގެ ކަނާތް އަދި ވާތްފަރާތު ކޮނޑުހުޅު ދުޅަވެ، ރަތްވެފައިވާ ކަމަށާއި، ކަރުގައިވެސް ރަތްވެފައިވާކަން ފާހަގަކުރެވިފައިވާކަމަށް ބަންދު އަމުރުގައި ފާހަގަކޮށްފައިވެއެވެ. މި މައްސަލައިގައި ފިލައިގެން އުޅުނު މި މީހާ ހައްޔަރުކޮށްފައިވަނީ މާލެ ޕެޓްރޯލްކުރަމުންދިޔަ ފުލުހުންނެވެ. އޭނާ ފިހާރައެއް ކައިރީގައި މަޑުކޮށްގެން ހުއްޓައި، ފުލުހުން ބަލައި ފާސްކުރުމުން އޭނާގެ ޖީބުން 820 ރުފިޔާ ފެނިފައިވެއެވެ. އެ ފައިސާއަކީ އޭނާގެ ފައިސާކަމަށް ބުނެފައިވާއިރު، އެ ފައިސާ ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
މި މީހާ ބަންދުކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައި ކަމަށް ބަންދު އަމުރުގައި ބަޔާންކޮށްފައިވެއެވެ.
