ޓޫރިޒަމް ދާއިރާގައި ހަރަކާތްތެރިވެ ޓީޖީއެސްޓީ ދައްކަމުންދާ ފަރާތްތަކުން ބޭރުފައިސާއާ ބެހޭ ގަވާއިދުގެ ދަށުން އެމްއެމްއޭގައި ވީއެންމެ އަވަހަކަށް ރަޖިސްޓަރީ ވުމަށް އެ އިދާރާއިން އެދެފިއެވެ. އެމްއެމްއޭއިން ބުނެފައިވަނީ އޮނލައިންކޮށް ރަޖިސްޓަރީ ވުމަށް ބޭނުންވާ ފަރާތްތަކަށް އެމްއެމްއޭގެ އެފްއެކްސް ރެޖިސްޓްރޭޝަން ޕޯޓަލް މެދުވެރިކޮށް ރަޖިސްޓަރީ ވެވޭނެ ކަމަށެވެ. އެމްއެމްއޭގައި ރަޖިސްޓަރީ ވުމުގެ އެންމެފަހު ސުންގަޑިއަކީ މި މަހުގެ 30 ވަނަ ދުވަހެވެ.
އެމްއެމްއޭއިން މި އޮކްޓޯބަރު މަހު އެކުލަވާލި އާ އުސޫލުގެ ދަށުން ޓޫރިޒަމް ވިޔަފާރިކުރާ ފަރާތްތަކުން ރާއްޖޭގެ ބޭންކްތަކަށް ޑޮލަރު މާރުކުރުން ލާޒިމްކޮށްފައިވެއެވެ. މިގޮތުން ޓޫރިޒަމް ވިޔަފާރިކުރާ ތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރަން ޖެހޭނެއެވެ.
އޭ ކެޓަގަރީގައި ހިމެނޭ ޓޫރިސްޓް ރިޒޯޓު، ހޮޓާ އަދި އުޅަނދުފަހަރުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަންޖެހެއެވެ. އަދި ބީ ކެޓަގަރީގައި ހިމެނޭ ތަންތަނުން ކޮންމެ ޓޫރިސްޓަކަށް 25 ޑޮލަރު މާރުކުރަން ޖެހެއެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި މިއަހަރުގެ އޮކްޓޯބަރު 22 ވަނަ ދުވަހުގެ ނިޔަލަށް ރާއްޖެއަށް 1،608،953 ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި 1،471،455 ފަތުރުވެރިންނާ އަޅާބަލާއިރު 9.3 އިންސައްތައިގެ އިތުރުވުމެކެވެ.
