އައިޖީއެމްއެޗްގެ ކިއު މަދުކުރުމަށް އާ ފިޔަވަޅެއްގެ ގޮތުން ޖެނެރަލް ޕްރެކްޓިސް (ޖީޕީ) ކްލިނިކްތަކެއް ހުޅުވައި، ރިފަރަލް ސިސްޓަމަކަށް ބަދަލުވުމަށް ނިންމާފައިވާ ކަމަށް މާލެ ހޮސްޕިޓަލްސް ގްރޫޕުން އިއުލާނުކޮށްފިއެވެ.
މި ބަދަލާއެކު، އިމަޖެންސީ ހާލަތްތައް ފިޔަވައި އާންމު ބަލިތަކަށް ފުރަތަމަ ޖީޕީ ކްލިނިކްތަކަށް ގޮސް، އެތަނުގެ މެޑިކަލް އޮފިސަރުގެ ލަފާގެ މަތިން ސްޕެޝަލިސްޓަކަށް ދެއްކުމަށް ބޭނުންވާނަމަ، ސީދާ ކްލިނިކުން އައިޖީއެމްއެޗަށް އެޕޮއިންޓްމަންޓް ހަމަޖައްސައިދޭނެ ކަމަށް ސީއީއޯ އިބްރާހިމް ހަލީމް ވިދާޅުވެފައިވެއެވެ.
މިހާރު ރާއްޖޭގައި ރިފަރަލް ސިސްޓަމެއް ނެތުމުން، ކުދިކުދި މައްސަލަތަކުގައިވެސް އީއާރަށް ދިއުމާއި، ބައްޔާ ގުޅުމެއް ނެތް ސްޕެޝަލިސްޓުންނަށް އެޕޮއިންޓްމަންޓް ހެދުން އާންމުވެފައިވާ ކަމަށް ފާހަގަކުރެވިފައިވެއެވެ. އާ ސިސްޓަމަށް ބަދަލުވުމުން އާސަންދައަށް ލުއިވެ، ބަލިމީހުންނަށް އެކަށޭނަ ސްޕެޝަލިސްޓުންނަށް ފަސޭހައިން އެޕޮއިންޓްމަންޓް ލިބޭނެއެވެ.
ދަރުމަވަންތަ ހޮސްޕިޓަލްގެ ޑެޕިއުޓީ ސީއީއޯ ޑރ. ޝާހު މާހިރު ވިދާޅުވިގޮތުގައި، އަންނަ އަހަރު މާލޭގެ ހަތަރު އަވަށެއްގައި ޖީޕީ ކްލިނިކް ހުޅުވުމަށް ވަނީ ރޭވިފައެވެ. އަދި މިހާރުވެސް ހުޅުމާލެ ފޭސް 2 ގައި ހިންގަމުންދާ ޖީޕީ ކްލިނިކްގެ ޚިދުމަތް ރޭގަނޑު 11:30 އަށް ދަންމާލެވި، އިތުރު ކްލިނިކެއް ހުޅުމާލޭގައި ހެދުމަށްވެސް ވަނީ ނިންމާފައެވެ.
އައިޖީއެމްއެޗްގެ މެޑިކަލް ޑިރެކްޓަރު ޑރ. އާމިނަތު ޒޭބާ އަހުމަދު ވިދާޅުވީ، މިހާރު ބައެއް ޑިޕާޓްމަންޓުތަކުގެ ވެއިޓްލިސްޓް 1,000 އަށްވުރެ މައްޗަށް އަރާއިރު، ރިފަރަލް ސިސްޓަމަކަށް ބަދަލުވުމުން މި އަދަދު މަދުވެ، ބަލިމީހުންނަށް އެކަށޭނަ ޚިދުމަތް ލިބުން އަވަސްވެގެންދާނެ ކަމަށެވެ.
ދުނިޔޭގެ ގިނަ ޤައުމުތަކުގައިވެސް ޢަމަލުކުރަނީ މިފަދަ ރިފަރަލް ސިސްޓަމަކަށް ކަމަށް ފާހަގަކުރައްވައި، މިއީ ބަލިމީހުންނަށާއި ހޮސްޕިޓަލްތަކަށް ލުއިފަސޭހަވާނެ ނިޒާމެއް ކަމުގައި ވިދާޅުވިއެވެ.
