ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އިއުލާން ކުރި ގޮތުގައި އަންހެނުންނަށް ޚާއްޞަކޮށްގެން "ބިގިނަރސް އިލެކްޓްރީޝަން ކޯސް ފޯރ ވިމެން" ގެ ނަމުގައި ކޯހެއް ފެށުމަށް ތައްޔާރުވަމުންދާ ކަމަށް މިއަދު ހާމަކޮށްފިއެވެ. މި ކޯހުގެ މައިގަނޑު މަޤްސަދަކީ އިލެކްޓްރިކަލް ދާއިރާއަށް އަންހެނުން ޝައުޤުވެރިކުރުވައި، އެ ދާއިރާގައި ފިރިހެނުންނާ އެއް ހަމައެއްގައި މަސައްކަތްކުރުމުގެ ފުރުޞަތު ފަހިކޮށްދިނުމެވެ.
ސްޓެލްކޯގެ އެކްސް އެކައުންޓުގައި ޝާއިޢުކުރި ޕޯސްޓެއްގައި ހާމަކޮށްފައިވާ ގޮތުގައި މި ކޯހުގައި ރައްކާތެރި ގޮތުގައި ކަރަންޓު ބޭނުންކުރުމާއި، ކަރަންޓަށް ކުރާ ޚަރަދު ކުޑަކުރުމުގެ އިތުރުން ކަރަންޓު ވަޔަރުކުރުމުގެ އަސާސީ މަޢުލޫމާތު ކިޔަވައިދޭން ވަނީ ހަމަޖެހިފައެވެ. މާލޭގައި ބޭއްވުމަށް ހަމަޖެހިފައިވާ މި ކޯހުގައި 16 އަހަރުން މަތީގެ ކަނބަލުންނަށް ހިލޭ ބައިވެރިވެވޭނެއެވެ.
ކޯހުގައި ބައިވެރިވުމަށް ޝައުގުވެރިވާ ފަރާތްތަކަށް 4 ނޮވެންބަރު ވަނަ ދުވަހުގެ 15:00 ގެ ނިޔަލަށް ކުރިމަތިލުމުގެ ފުރުސަތު އޮންނާނެއެވެ.
