ރާއްޖޭގެ އިގްތިސާދީ ހާލަތު ރަނގަޅުކުރުމަށް ރައީސް ޑރ. މުހައްމަދު މުއިއްޒު އަޅުއްވަމުންދާ ފިޔަވަޅުތަކަށް އިތުރު ބާރަކަށްވާގޮތަށް، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް މުސާރައިން 50 އިންސައްތަ ނުނަންގަވާގޮތަށް ނިންމަވައިފިއެވެ. މިކަން އަބުދުއްރަހީމް ހާމަކުރެއްވީ އެކްސް މެދުވެރިކޮށް ކުރެއްވި ޕޯސްޓެއްގައެވެ.
ރައީސް މުއިއްޒުގެ ސަރުކާރުން ވަނީ ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން 10 އިންސައްތަ އުނިކުރުމަށް ނިންމަވާފައެވެ. އަދި ރައީސް އަމިއްލަފުޅަށް 50 އިންސައްތަ މުސާރަ ދޫކޮށްލައްވާ ގޮތަށް ނިންމަވާފައިވާއިރު، ސަރުކާރުގެ ޚަރަދުތައް ކުޑަކުރުމަށް އިތުރު ގިނަ ފިޔަވަޅުތަކެއްވެސް އަޅުއްވަމުން ގެންދަވައެވެ.
2025 ވަނަ އަހަރުގެ ދައުލަތުގެ ބަޖެޓު މަޖިލީހަށް ހުށަހެޅުމުގެ ކުރިން، ޚަރަދުތައް އިތުރަށް ކުޑަކުރުމަށް ރައީސް މުއިއްޒު ވަނީ ނިންމަވާފައެވެ. މި އިސްލާހީ ފިޔަވަޅުތައް ދެމިއޮންނާނީ ދެ އަހަރު ދުވަހުގެ މުއްދަތަށެވެ. މީގެ ތެރޭގައި ސިޔާސީ މުވައްޒަފުންގެ އަދަދު މަދުކުރުމާއި، ސަރުކާރު ކުންފުނިތަކުގެ އިސްވެރިންގެ މުސާރައަށް އެންމެ މަތީ މިންގަނޑެއް ކަނޑައެޅުން ހިމެނެއެވެ.
