އަންނަ މަހުގެ ފުރަތަމަ ދުވަހުން ފެށިގެން ރާއްޖެއިން ބޭރުގައި ކިޔަވާ ދަރިވަރުންނަށް ކާޑުން ނެގޭނެ ޑޮލަރުގެ އަދަދު އިތުރުކުރުމަށް ބޭންކް އޮފް މޯލްޑިވްސް (ބީއެމްއެލް) އިން ނިންމާއިފިއެވެ. މިހާރު މަހަކު 750 ޑޮލަރު ނެގެމުންދާއިރު، އައު ބަދަލާއެކު މަހަކު 1200 ޑޮލަރު ނެގުމުގެ ފުރުސަތު ލިބިގެންދާނެއެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވި ގޮތުގައި، ބޭންކަށް ޑޮލަރު ލިބުމުގައި ދަތިތަކެއް ހުރި ނަމަވެސް، ބޭރުގައި ކިޔަވާ ދަރިވަރުންނަށް ދިމާވެފައިވާ ދަތިތަކަށް އެހީތެރިކަމެއްގެ ގޮތުން މިފަދަ ނިންމުމެއް ނިންމަން ޖެހުނީއެވެ.
އައު ލިމިޓަށް ބަދަލުވުމަށް ބޭނުންވާ ދަރިވަރުން، ކަމާގުޅޭ ލިޔެކިޔުންތަކާއެކު ބީއެމްއެލްގެ އޮންލައިން ޕޯޓަލް މެދުވެރިކޮށް ހުށަހެޅުމުން އެކަން ހަމަޖެހޭނެކަމަށް ބޭންކުން މަޢުލޫމާތު ދެއެވެ. އަދި މިކަމާ ގުޅޭ އިތުރު ތަފްސީލް ކުރިއަށް އޮތް ދުވަސްތަކުގައި ހާމަކުރަމުން ގެންދާނެކަމަށްވެސް ބޭންކުން ބުނެފައިވެއެވެ.
