ހަތަރު ޓެކްސް ބިލް، އިތުރަށް ދިރާސާކުރުމަށް މާލިއްޔަތު އަދި އިގްތިސާދީ ކޮމިޓީން އެކުލަވާލާ ސަބް ކޮމިޓީއަކަށް ފޮނުވައިފިއެވެ.
މި ބިލްތަކުގެ ތެރޭގައި މާފަންނު ހުޅަނގު ދާއިރާގެ މެންބަރު މުސްތަފާ އިބްރާހިމް ހުށަހެޅުއްވި، މިހާރު 16 ޕަސެންޓުގައި ނަގަމުންދާ ޓޫރިޒަމް ޖީއެސްޓީ އަންނަ އަހަރުގެ ޖޫން މަހުން ފެށިގެން 17 ޕަސެންޓަށް ބޮޑުކުރުމަށް ހުށަހަޅާ ބިލް ހިމެނެއެވެ. މި ބަދަލާއެކު ދައުލަތަށް އިތުރު 200 މިލިއަން ރުފިޔާ ލިބޭނެކަމަށް ލަފާކުރެވެއެވެ.
ހަމައެހެންމެ، މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސެއިން ސަރުކާރުގެ ފަރާތުން ހުށަހެޅުއްވި ބިލުގައި، ގްރީން ޓެކްސް 100 ޕަސެންޓަށް ބޮޑުކުރުމަށް ވަނީ ހުށަހަޅުއްވާފައެވެ. މީގެ ދަށުން، މިހާރު ހަ ޑޮލަރު ދައްކަމުންދާ ފަރާތްތަކުން 12 ޑޮލަރު، އަދި ތިން ޑޮލަރު ދައްކަމުންދާ ފަރާތްތަކުން ހަ ޑޮލަރު ދައްކަންޖެހޭނެއެވެ. މި ބަދަލު 2025 ވަނަ އަހަރު ތަންފީޒުކުރެވޭއިރު، ދައުލަތަށް 963.6 މިލިއަން ރުފިޔާގެ އާމްދަނީ އިތުރުވާނެކަމަށް ލަފާކުރެވެއެވެ.
ދެން އޮތީ ގެމަނަފުށީ ދާއިރާގެ މެންބަރު އަސަދުﷲ ޝިހާބް ހުށަހެޅުއްވި، ޑިޕާޗަރ ޓެކްސް ބޮޑުކުރުމުގެ ބިލެވެ. މި ބިލުގެ ދަށުން، އަންނަ ޑިސެމްބަރު މަހުން ފެށިގެން އިކޮނޮމިކް ކްލާހުން ފުރާ ބިދޭސީންގެ އަތުން 50 ޑޮލަރު، ބިޒްނަސް ކްލާހުން ދަތުރުކުރާ ފަރާތްތަކުން 120 ޑޮލަރު، ފަސްޓް ކްލާހުން 240 ޑޮލަރު އަދި ޕްރައިވެޓް ޖެޓުން ދަތުރުކުރާ ފަރާތްތަކުން 480 ޑޮލަރު ނެގުމަށް ވަނީ ހުށަހަޅާފައެވެ.
އެންމެ ފަހު ބިލަކީ މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު ހުށަހެޅުއްވި، ވޭޕް އަދި ދުންފަތުގެ އުފެއްދުންތަކުގެ އިމްޕޯޓް ޑިއުޓީ ބޮޑުކުރުމުގެ ބިލެވެ. މި ބިލުގައި، އިލެކްޓްރޯނިކް ސިނގިރޭޓާއި ވޭޕިންގ އާލާތްތަކުގެ ޑިއުޓީ 200 ޕަސެންޓަށް ބޮޑުކުރުމަށާއި، ސިނގިރޭޓާއި ބިޑީގެ ޑިއުޓީ 50 ޕަސެންޓަށް ބޮޑުކުރުމަށް ވަނީ ހުށަހަޅާފައެވެ. މި ބަދަލުތަކާއެކު ސިނގިރޭޓު އަދި ބިޑީގެ ޑިއުޓީ އަށް ރުފިޔާއަށް އަރާނެއެވެ.
މި ހަތަރު ބިލަށްވެސް މެންބަރުން އިސްލާހު ހުށަހަޅުއްވާފައިވީ ނަމަވެސް، އިތުރަށް ދިރާސާކުރުމަށް ސަބް ކޮމިޓީއަކަށް ފޮނުވުމަށް ސަރުކާރު ހިންގާ ޕީއެންސީގެ މެންބަރުން ހުށަހެޅުއްވި ހުށަހެޅުއްވުމަށް ވޯޓަށް އަހައި، އެގޮތަށް ވަނީ ފާސްކުރެވިފައެވެ.
