ހުޅުމާލޭގެ ދެވަނަ ފިޔަވަހިން ސިނާއީ ބޭނުންތަކަށް "ލައިޓް އިންޑަސްޓްރިއަލް" މަސައްކަތްތަކަށް ބިން ވިއްކުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ. މިގޮތުން ވިއްކުމަށް ހަމަޖެހިފައިވަނީ 1،515 އަކަފޫޓާއި 1،538 އަކަފޫޓާ ދެމެދުގެ 16 ބިމެވެ.
އިއްޔެ އެޗްޑީސީން ކުރި އިއުލާނުގައިވާ ގޮތުން، މި ބިންތަކަށް ކުރިމަތިލެވޭނީ ހަމައެކަނި ދިވެހިންނަށެވެ. އެގޮތުން އުމުރުން 18 އަހަރު ފުރިފައިވާ ކޮންމެ ދިވެހި ރައްޔިތަކަށް ބީލަން ހުށަހެޅިދާނެއެވެ. ކުންފުނިތަކުން ކުރިމަތިލާނަމަ، އެ ކުންފުންޏަކީ ރާއްޖޭގައި ރަޖިސްޓްރީ ކޮށްފައިވާ، 100 އިންސައްތަ ދިވެހިންގެ ހިއްސާ އޮންނަ ކުންފުންޏަކަށް ވާންޖެހޭނެއެވެ.
ބިން ވިއްކުމުގެ މަރުހަލާ ކުރިއަށްދާނީ ދެ ބަޔަކަށް ބަހާލައިގެންނެވެ. އެންމެ ފުރަތަމަ އެކްސްޕްރެޝަން އޮފް އިންޓަރެސްޓް (އީއޯއައި) ހުށަހަޅަންޖެހޭނެއެވެ. އޭގެފަހުން، އެއް ބިމަކަށް އެއް ފަރާތަށްވުރެ ގިނަ ފަރާތުން އީއޯއައި ހުށަހަޅާފައިވާނަމަ، ބިޑު ކުރިއަށް ގެންދެވޭނެއެވެ. މި ބިންތަކުގެ އަކަފޫޓެއްގެ ފެށޭ އަގަކީ 5،500 ރުފިޔާއެވެ. އަދި އެއް ފަރާތަކަށް ގިނަވެގެން ގަނެވޭނީ ތިން ބިމެވެ.
އެޗްޑީސީން މައުލޫމާތު ދީފައިވާ ގޮތުގައި ބީލަންތައް ކުރިއަށް ގެންދެވޭނީ އެ ކޯޕަރޭޝަނުގެ އޮންލައިން ބިޑު ޕޯޓަލް މެދުވެރިކޮށެވެ. އަދި ވިއްކަން ހުޅުވާލާފައިވާ ބިންތަކުގެ އިތުރު މައުލޫމާތު ބިޑު ޕޯޓަލުން ލިބެން ހުންނާނެއެވެ. މީގެ އިތުރުން، އިތުރު މައުލޫމާތު ހޯދުމަށް ކޯޕަރޭޝަނުގެ ހޮޓްލައިން ނަންބަރު 1516 އަށް ގުޅައިގެން ސާފުކުރެވޭނެއެވެ.
