ޒުވާނުންގެ ދުވަހު ޒުވާނުން ޢަޒުމު އާކުރަންވީ، ބުރަމަސަތްކަތާއި ޤުރުބާނީއިން ހޯދި ޙައްޤުތައް ބީވެގެން ދިޔަ ނުދިނުމަށް ކަމުގައި ކުރީގެ ފޮރިން މިނިސްޓަރ އަދި އެމްޑީޕީގެ ރައީސް އަބުދުﷲ ޝާހިދު ވިދާޅުވެއްޖެއެވެ.
މިއަދު ފާހަގަ ކުރެވެމުންދާ ޒުވާނުންގެ ދުވަހުގެ މުޒާސަބަތުގައި ޝާހިދު ކުރެއްވި އެކްސް ޕޯސްޓެއްގައި ވިދާޅުވީ 2008 ވަނަ އަހަރު ޢަމަލުކުރަންފެށި ޤާނޫނު އަސާސީ އެކުލަވާލި ރައްޔިތުންގެ ޚާއްސަ މަޖިލީހުގައި އެމްޑީޕީ އިން އިސްނަގައި ވަކާލާތުކޮށް 18 އަހަރުން މަތީގެ ކޮންމެ މީހަކަށް އިންތިޚާބުތަކުގައި ވޯޓު ދިނުމާއި އިންތިޚާބުތަކުގައި ވާދަކުރުމުގެ ޙައްޤު ލިބުނު ދުވަސް، ޒުވާނުންގެ ދުވަހުގެ ގޮތުގައި ރައީސް ސާލިޙު ހަމަޖެއްސެވީ އެމްޑީޕީއަކީ އަބަދުވެސް ޒުވާނުންގެ ޙައްޤުތައް ކަށަވަރުކުރުމުގައި ދެގޮތެއް ނުވެ ދެމި އޮންނަ ޕާޓީއަކަށް ވާތީ ކަމުގައެވެ.
އަދި ޒުވާނުންގެ ދުވަސް މިއަދު ފާހަގަކުރަމުންދާއިރު, 18 އަހަރު ފުރޭ ޒުވާނުންގެ ޙައްޤުތައް މި ސަރުކާރުން ނިގުޅައިގަނެ ހަނިކުރަމުންގެންދާތީ އެކަމާ ދެކޮޅަށް އެންމެހާ ޒުވާނުންވެސް މިއަދު އަޑުފުލަންޖެހޭ ކަމުގައިވެސް ޝާހިދުގެ އެކްސް ޕޯސްޓުގައި ވިދާޅުވެފައި ވެއެވެ.
ޒުވާނުންގެ ދުވަހު އެންމެހާ ދިވެހި ޒުވާނުންވެސް ޢަޒުމު އާކުރަންވީ، ބުރަމަސަތްކަތާއި ޤުރުބާނީއިން ހޯދި ޙައްޤުތައް ހިފެހެއްޓުމަށް.
ޝާހިދުގެ އެކްސް ޕޯސްޓުގައި ވިދާޅުވެފައި ވެއެވެ.
ޝާހިދުވަނީ ޒުވާނުންގެ ދުވަހުގެ މުނާސަބަތުގައި ރާއްޖޭގެ އެންމެހާ ޒުވާނުންނަށް ތަހުނިޔާ ފޮނުއްވާފައެވެ.
ރާއްޖޭގައި އެންމެ ފުރަތަމަ ޒުވާނުންގެ ދުވަސް ފާހަގަކޮށްފައިވަނީ މާޗް 1، 1992 ގަ އެވެ. އޭގެ ފަހުން ދުނިޔޭގެ ޒުވާނުންގެ ދުވަސް ކަމަށްވާ އޮގަސްޓް 12 ވަނަ ދުވަހު ވެސް ރާއްޖޭގައި ޒުވާނުންގެ ދުވަސް ފާހަގަކޮށްފައި ވެ އެވެ.
އަންނަ އަހަރުން ފެށިގެން ޒުވާނުންގެ ދުވަހަކީ އޮކްޓޫބަރު 22 ވަނަ ދުވަސް ކަމަށް ސަރުކާރުން ހަމަޖެއްސުމާ ގުޅިގެން، އެ ދުވަސް ކުލަ ގަދަ ގޮތެއްގައި ފާހަގަކުރަން ހާއްސަ ޕްރޮގްރާމްތާކެއް ހިންގަން ވަނީ ނިންމައިފަ އެވެ.
ރައީސް ޔާމިންގެ ވެރިކަމުން ފެށިގެން ޒުވާނުންގެ ދުވަސް ފާހަގަކޮށްފައިވަނީ، ކުރީގެ ރައީސް އަބްދުﷲ ޔާމީން ހުވާކުރެއްވި ތާރީހު ކަމުގައިވާ ނޮވެމްބަރު 17ގަ އެވެ.
އެހެންނަމަވެސް، އާ ގާނޫނު އަސާސީން، 18 އަހަރުން މަތީގެ ކޮންމެ މީހަކަށް އިންތިޚާބުތަކުގައި ވޯޓު ދިނުމާއި އިންތިޚާބުތަކުގައި ވާދަކުރުމުގެ ޙައްޤު ލިބުނު ދުވަސް، ޒުވާނުންގެ ދުވަހުގެ ގޮތުގައި ފާހަގަކުރާގޮތަށް ހަމަޖެއްސެވީ ރައީސް ސާލިހުގެ ވެރިކަމުގައި 2019 ވަނަ އަހަރުއެވެ. އެގޮތުން ޒުވާނުންގެ ދުވަހުގެ ގޮތުގައި އޮކްޓޯބަރ 22 އެންމެ ފުރަތަމަ ފާހަގަ ކުރީ 2020 ވަނަ އަހަރުއެވެ.
