މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އާއި ޓޫރިޒަމް މިނިސްޓްރީގެ އިސްނެގުމުގައި މިއަހަރުގެ ފަތުރުވެރިކަމާބެހޭ މަހާސިންތާ މިއަދު ވަނީ ކްރޮސްރޯޑްސްގައި ފެށިފައެވެ.
މި މަހާސިންތާގައި ރިސޯޓްތައް، ގެސްޓްހައުސްތައް، ލިވަބޯޑްތައް އަދި ލޯކަލް ޓުއަރިޒަމްގެ ދާއިރާގައި މަސައްކަތްކުރާ ފަރާތްތަކާއި، ޓްރެވަލް އެޖެންޓުން، ފަތުރުވެރިކަމާބެހޭ ޖަމްޢިއްޔާތައް އަދި ޓްރެވަލް މީޑިއާތައް ހިމެނޭގޮތަށް 150 އަށްވުރެ ގިނަ ފަރާތްތަކުން ބައިވެރިވެވަޑައިގަންނަވައެވެ.
މަހާސިންތާގައި، ޓޫރިޒަމް މިނިސްޓަރު އިބްރާހިމް ފައިސަލް، އެމްއެމްޕީއާރްސީގެ މެނޭޖިންގ ޑިރެކްޓަރު ޝިއުރީ އިބްރާހިމް އަދި އެމްއެމްޕީއާރްސީގެ ޗެއަރޕާސަން ޢަބްދުﷲ ގިޔާސް ބައިވެރިވެވަޑައިގަންނަވާއިރު، ފަތުރުވެރިކަމުގެ އައު ސެގްމަންޓްތައް ތަޢާރަފުކުރުމާ ބެހޭގޮތުން މަޝްވަރާކުރުމަށާއި، ޕެނަލް ޑިސްކަޝަންތަކާއި ގްރޫޕް ޑިސްކަޝަންތައް ކުރިއަށްގެންދިއުމަށް ވަނީ ހަމަޖެހިފައެވެ.
އެމްއެމްޕީއާރްސީން މަޢުލޫމާތު ދެއްވާފައިވާ ގޮތުގައި، މި މަހާސިންތާގެ މައިގަނޑު މަޤްޞަދަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށްޓަކައި ކުރެވިދާނެ ކަންތައްތަކާމެދު ދާއިރާގެ ފަރާތްތަކާއެކު މަޝްވަރާކޮށް، އައު ޚިޔާލުތަކާއި ވިސްނުންތައް ހޯދުމެވެ.
