ވޭޕް އެތެރެކުރުން މަނާކުރުމާއެކު، އެ ބާވަތްތަކުންނާއި ސިނގިރޭޓުން ނަގާ އިމްޕޯޓް ޑިއުޓީ ބޮޑުކުރުމަށް ހުށަހެޅި ބިލް ވަނީ މިއަދު މަޖިލީހުން ބަލައިގަނެ، މުޅި މަޖިލީހުގެ ކޮމިޓީއަށް ފޮނުވާފައެވެ.
މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު ހުށަހެޅުއްވި މި ބިލަށް 71 މެންބަރުންގެ ތެރެއިން 65 މެންބަރުން ވޯޓުދެއްވާފައިވާއިރު، އެމްޑީޕީގެ ތިން މެންބަރުން ވޯޓުދެއްވީ ބިލް ބަލައިނުގަތުމަށެވެ.
މި ބިލުގެ މައިގަނޑު މަޤްޞަދަކީ ދުންފަތާއި ދުންފަތުން އުފައްދާ ބާވަތްތަކާއި ދުންފަތުގެ ބަދަލުގައި ބޭނުންކުރާ ތަކެތިން ނަގާ އިމްޕޯޓް ޑިއުޓީ އިތުރުކުރުމެވެ. އަދި އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތައް އެތެރެކުރުން މަނާކުރެވޭ ތާރީޚާ ހަމައަށް، އިމްޕޯޓް ޑިއުޓީއާއި ރޯޔަލްޓީ އަދި ރެވެނިއު ފީ މައާފުކުރެވޭނެ އުސޫލުތައް ކަނޑައެޅުމެވެ.
ބިލުގައި ހުށަހަޅާފައިވާ ގޮތުން، އިލެކްޓްރޯނިކް ސިނގިރޭޓާއި ވޭޕްކުރުމަށް ބޭނުންކުރާ އާލާތްތަކާއި ޓޮބޭކޯ ހީޓިން ޕްރޮޑަކްޓުތަކުގެ ޑިއުޓީ 200 ޕަސެންޓަށް ބޮޑުކުރެވޭނެއެވެ. ސިނގިރޭޓާއި ބިޑީގެ ޑިއުޓީ 50 ޕަސެންޓަށް، އެއީ އަށް ރުފިޔާއަށް ބޮޑުކުރުމަށް ވަނީ ހުށަހަޅާފައެވެ. މީގެއިތުރުން، ވޭޕްގެ ފްލޭވާ އާއި ކެމިކަލްތަކުން މިލިލީޓަރަކަށް އަށް ރުފިޔާގެ ޑިއުޓީއެއް ނެގުމަށާއި، ހީޓަޑް ޓޮބޭކޯ ޕްރޮޑަކްޓުތަކުގެ ސްޓިކަކުން އަށް ރުފިޔާގެ ޑިއުޓީއެއް ނެގުމަށްވެސް ވަނީ ހުށަހަޅާފައެވެ.
ރައީސް މުޙައްމަދު މުޢިއްޒު ވަނީ މިމަހުގެ 14 ވަނަ ދުވަހު އެކްސްގައި ކުރެއްވި ޕޯސްޓެއްގައި، ނޮވެމްބަރު 15، 2024 އިން ފެށިގެން ވޭޕްކުރުމަށް ބޭނުންކުރާ ތަކެތި އެތެރެކުރުން މަނާކުރައްވާ، ޑިސެމްބަރު 15، 2024 އިން ފެށިގެން އެ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރުކުރުމާއި ހިލޭ ބެހުން މަނާކުރައްވާފައެވެ. އަދި ދުންފަތުގެ އުފެއްދުންތަކުގެ ވިޔަފާރީގެ މުޢާމަލާތްތަކުގައި އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށްވެސް ވަނީ ނިންމަވާފައެވެ.
