ކުރީގެ ސަރުކާރުން ތަޢާރަފުކުރި "ބިންވެރިޔާ" އަދި "ގެދޮރުވެރިޔާ" ސްކީމުގެ ދަށުން މާލޭ ރައްޔިތުންނަށް ދޫކުރި ފުލެޓުތަކާއި ގޯތިތައް ހަވާލުކުރުން ލަސްވަމުންދާތީ، އިދިކޮޅު އެމްޑީޕީން މިއަދު މުޒާހަރާއެއް ކޮށްފިއެވެ.
މި މުޒާހަރާ ކުރިއަށް ގެންދިޔައީ ރައްޔިތުންގެ މަޖިލީހުގެ އިދާރާ ކައިރީގައި ކަމަށްވާއިރު، އެ ޕާޓީގެ މަޖިލިސް މެންބަރުންނާއި އާންމު ރައްޔިތުން މީގައި ބައިވެރިވިއެވެ. މުޒާހަރާގެ ބައިވެރިން މާލޭގެ މައިގަނޑު މަގުތަކުގައިވެސް އެމީހުންގެ ނުރުހުން ފާޅުކުރިއެވެ.
މުޒާހަރާގެ ބައިވެރިން ބުނާގޮތުގައި މި މުޒާހަރާގެ މަޤްޞަދަކީ ފުލެޓާއި ގޯތި ލިބެންޖެހޭ ފަރާތްތަކުގެ ކަންބޮޑުވުންތައް ފާޅުކުރުމެވެ. އެމީހުން ވިދާޅުވި ގޮތުގައި، މަޖިލިސް ސަރަހައްދުގައި މުޒާހަރާކުރަނީ މަޖިލީހުގެ މެންބަރުންނަށް ރައްޔިތުންގެ އަޑު އިއްވުމަށްޓަކައެވެ. މި މުޒާހަރާގައި ބައިވެރިވި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙުމަދު ދީދީ ވަނީ ރައްޔިތުންނަށް ފުލެޓުތައް އަވަހަށް ދިނުމަށް ގޮވާލައްވާފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުން ތަޢާރަފުކުރި ބިންވެރިޔާ ސްކީމުގެ ދަށުން، ގާތްގަނޑަކަށް 19,000 މީހުން ގޯއްޗަށް ޝަރުތު ހަމަވާއިރު، 9,000 އަށްވުރެ ގިނަ ގޯތި ދޫކުރަން ނިންމާފައިވެއެވެ. މި ގޯތިތައް ދޫކުރަނީ ހުޅުމާލެ، ގުޅީފަޅު އަދި ގިރާވަރުފަޅުންނެވެ. އަދި ގެދޮރުވެރިޔާ ސްކީމުގެ ދަށުން 4,000 ފުލެޓު ހުޅުމާލޭގައި އިމާރާތްކުރަމުންދެއެވެ.
ނަމަވެސް، ފުލެޓަށް ޝަރުތު ހަމަވާ މީހުންގެ ލިސްޓުގައި މައްސަލައެއް އުޅޭ ކަމަށް ބުނެ އެންޓި ކޮރަޕްޝަން ކޮމިޝަނުން ވަނީ ތަޙުޤީޤެއް ހިންގާފައެވެ. މި ތަޙުޤީޤަށްފަހު، ހައުސިން މިނިސްޓްރީން ބުނެފައިވަނީ އޭސީސީން ފޮނުވި ލިސްޓަކީ ހަމައެކަނި ތަޙުޤީޤުގެ ބޭނުމަށް އެކުލަވާލި ލިސްޓެއްކަމަށާއި، ފުލެޓު ލިބޭނެ ފަރާތްތައް ކަނޑައެޅުމުގެ މަސައްކަތް ކުރިއަށްދާ ކަމަށެވެ.
މިކަމާ ގުޅިގެން ބައެއް ފަރާތްތަކުން ވަނީ ސަރުކާރުން ފުލެޓު ލިސްޓު ބާޠިލުކުރާކަމަށް ބުނެ ކަންބޮޑުވުން ފާޅުކޮށްފައެވެ.
