ބޭންކު އޮފް މޯލްޑިވްސް (ބީއެމްއެލް) އިން އިޢުލާނުކޮށްފައިވާ ގޮތުގައި، އެ ބޭންކުގެ ފުރަތަމަ ދިވެހި ސީއީއޯ މުހައްމަދު ޝަރީފް، ބޭންކުގެ ޑިރެކްޓަރުންގެ ބޯޑަށް އައްޔަންކުރުމަށްޓަކައި ހާއްސަ އާންމު ޖަލްސާއެއް ބޭއްވުމަށް ވަނީ ނިންމާފަވެއެވެ. މި ޖަލްސާ ބޭއްވުމަށް ހަމަޖެހިފައިވަނީ މި މަހުގެ 30 ވަނަ ދުވަހުގެ މެންދުރުފަހު 2:30 ގައި ކަމަށާއި، މި ޖަލްސާ ކުރިއަށްދާނީ މޯލްޑިވްސް ސެކިއުރިޓީ ޑިޕޮޒިޓަރީގެ އޮންލައިން މީޓިންގ މެނޭޖްމަންޓް ސިސްޓަމް "ފަހިވޯޓް" މެދުވެރިކޮށް ކަމަށް ބޭންކުން މަޢުލޫމާތު ދީފައިވެއެވެ.
ޖަލްސާގައި ބައިވެރިވުމުގެ ފުރުސަތު ލިބޭނީ މި މަހުގެ 28 ވަނަ ދުވަހުގެ މެންދުރުފަހު 2:30 ގެ ކުރިން ބޭންކުގެ ހިއްސާދާރުންގެ ދަފްތަރުގައި ރަޖިސްޓަރީވެފައިވާ ފަރާތްތަކަށް ކަމަށްވެސް ބޭންކުން ހާމަކޮށްފައިވެއެވެ. މުހައްމަދު ޝަރީފަކީ މާލީ ދާއިރާގައި 25 އަހަރަށްވުރެ ގިނަ ދުވަހުގެ ތަޖުރިބާ ލިބިފައިވާ، އަދި އޭގެ ތެރެއިން އެގްޒެކެޓިވް އަދި ބޯޑު ލެވެލްގައި 7 އަހަރަށްވުރެ ގިނަ ދުވަހު މަސައްކަތްކޮށްފައިވާ ބޭފުޅެކެވެ. އޭނާ ވަނީ އިނގިރޭސި ވިލާތުގެ ޔުނިވަސިޓީ އޮފް މެންޗެސްޓަރ އިން އެމްބީއޭ ހާސިލުކުރައްވާފައެވެ.
ބީއެމްއެލްގެ ހިންގާ ގަވާއިދުގެ 47 ވަނަ މާއްދާގައި ބަޔާންކޮށްފައިވާ ގޮތުން، ބޭންކުގެ ޑިރެކްޓަރުންގެ ބޯޑުގައި ހިމެނޭ 11 މެންބަރުންގެ ތެރެއިން މަދުވެގެން 8 ޑިރެކްޓަރުންނަކީ ސަރުކާރުގެ ފަރާތުން ބޯޑަށް އައްޔަންކުރާ ފަރާތްތަކަށް ވާންޖެހެއެވެ. އަދި އަނެއް 3 މެންބަރުންނަކީ އާންމު ހިއްސާދާރުންގެ ފަރާތުން ބޯޑަށް އައްޔަންކުރާ މެންބަރުންނެވެ.
މިހާރު ސަރުކާރުން ވަނީ ހުސްވެފައިވާ 2 މަގާމުގެ ތެރެއިން އެއް މަގާމަށް މުހައްމަދު ޝަރީފް އައްޔަންކުރުމަށް ހުށަހަޅާފައެވެ.
