ރައްޔިތުންގެ މަޖިލީހަށް ހުށަހެޅިފައިވާ އައު ބިލަކުން ދުންފަތުގެ އުފެއްދުންތަކާއި ވޭޕިންގ އާލާތްތަކުގެ އިމްޕޯޓް ޑިއުޓީ މަތިކުރުމަށް ހުށަހަޅާފައިވެއެވެ. މި ބިލު ސަރުކާރުގެ ފަރާތުން ހުށަހެޅުއްވީ މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު (އިއްބެ ޖަނާބު) އެވެ.
މި ބިލުގެ މައިގަނޑު މަޤްޞަދަކީ ދިވެހިރާއްޖޭގެ އިމްޕޯޓް އެކްސްޕޯޓްގެ ޤާނޫނަށް އިޞްލާޙު ގެނައުމެވެ. ރާއްޖޭގައި ވޭޕް މަނާކުރުމަށް ނިންމާފައިވީ ނަމަވެސް، އެކަން ތަންފީޒުކުރެވެންދެން ހިނގާ މުއްދަތުގައި އެތެރެކުރެވޭ ވޭޕާއި ވޭޕް ފްލޭވަރުގެ އިމްޕޯޓް ޑިއުޓީ ބޮޑުކުރުން ހިމެނެއެވެ.
އައު ހުށަހެޅުމުގެ ދަށުން، ސިނގިރޭޓާއި ބިޑީގެ އިމްޕޯޓް ޑިއުޓީ 50 އިންސައްތައަށް އިތުރުކޮށް، އަދި ކޮންމެ އެއްޗަކުން 8 ރުފިޔާ ނެގުމަށް ހުށަހަޅާފައިވެއެވެ. މީގެ އިތުރުން، އީ-ސިނގިރޭޓް ފްލޭވަރާއި ހޫނުކޮށްގެން ބޭނުންކުރާ ދުންފަތުގެ އުފެއްދުންތަކުގެ ޑިއުޓީވެސް 50 އިންސައްތައަށް މަތިކޮށް، މިލިލީޓަރަކުން އަދި ސްޓިކަކުން 8 ރުފިޔާ ނެގުމަށް ހުށަހަޅާފައިވެއެވެ.
މި އައު އިޞްލާޙުތައް ނޮވެމްބަރު މަހުގެ ފުރަތަމަ ދުވަހުން ފެށިގެން ތަންފީޒުކުރަން ނިންމާފައިވެއެވެ.
މި ބަދަލުތަކާ ގުޅިގެން ދައުލަތަށް ވޭޕް ފްލޭވަރުން އިތުރު 1.3 މިލިއަން ރުފިޔާ އަދި ވޭޕް ސްޓިކްތަކުން އިތުރު 9 ލައްކަ ރުފިޔާ ލިބޭނެ ކަމަށް ލަފާކުރެވެއެވެ. އަދި ސިނގިރޭޓާއި ބިޑީން މި އަހަރު 178 މިލިއަން ރުފިޔާ އިތުރަށް ލިބޭނެ ކަމަށް ބެލެވޭއިރު، ކުރިއަށް އޮތް ތިން އަހަރު ވަކިވަކިން އަހަރަކު އެއް ބިލިއަން ރުފިޔާގެ އާމްދަނީ ލިބޭނެ ކަމަށް ލަފާކުރެވެއެވެ.
