ފާއިތުވި 24 ގަޑިއިރުގެ ތެރޭގައި ރާއްޖޭގެ އުތުރުގެ ބައެއް ރަށްތަކަށް ވާރޭވެހުނު ނަމަވެސް، ދެކުނުގެ އަތޮޅުތަކުގެ މޫސުން ރަގަޅު ވެފައިވާކަމަށް މޫސުމާ ބެހޭ ގައުމީ އިދާރާ (މެޓް) އިން ހާމަކޮށްފިއެވެ.
އެންމެ ބޯކޮށް ވާރޭވެހުނީ ށ. ފުނަދޫއަށް ކަމަށާއި، އެ ރަށަށް 22.1 މިލިމީޓަރުގެ ވާރޭ ވެހުނެވެ. ދެވަނައަށް އެންމެ ބޯކޮށް ވާރޭވެހުނީ ރ. އިފުރަށް ކަމަށާއި، އެ ރަށަށް 12 މިލިމީޓަރުގެ ވާރޭ ވެހުނެވެ. މީގެ އިތުރުން ށ. ކޮމަންޑޫ، ހދ. ހަނިމާދޫ، ހދ. ކުޅުދުއްފުށި، ރ. އަލިފުށި އަދި ބ. ދަރަވަންދޫއަށްވެސް ވާރޭވެހުނު ކަމަށް މެޓުން ހާމަކުރިއެވެ.
މިއަދުގެ މޫސުމަށް ބަލާއިރު، ރާއްޖޭގެ ގިނަ ސަރަހައްދުތަކަށް މޫސުން ރަނގަޅުވާނެ ކަމަށް މެޓުން ލަފާކުރެއެވެ. ނަމަވެސް ހުޅަނގާއި ހުޅަނގު އުތުރުން ދެކުނުގެ އަތޮޅުތަކަށް ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، އެހެން އަތޮޅުތަކަށް ގަޑިއަކު 5 މޭލާއި 15 މޭލަށް ވައިޖެހޭނެ ކަމަށް މެޓުން ބުނެފައިވެއެވެ.
އަދި ދެކުނުގެ ކަނޑުތައް އާދައިގެ ވަރަކަށް ގަދަވާނެ ކަމަށާއި، ރާޅުގެ އުސްމިން 2 ފޫޓާއި 5 ފޫޓާ ދެމެދުގައި ހުންނާނެ ކަމަށްވެސް މެޓުން ލަފާކޮށްފައިވެއެވެ.
