ވަޒީފާގެ މާހައުލުގައި މުވައްޒަފެއްގެ ފުރާނަ ގެއްލިއްޖެނަމަ ވަޒީފާދޭ ފަރާތުން ބޮޑު ބަދަލެއް ދޭންޖެހޭ ގޮތަށް ހަމަޖައްސާ ލޭބާ ރިލޭޝަންސް އޮތޯރިޓީން އާ ގަވާއިދެއް ނެރެ،ފިއެވެ.
މިދިޔަ ބުދަ ދުވަހު އަމަލުކުރަން ފެށި "މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގަވާއިދު" ގައި ވާގޮތުން، މަސައްކަތުގެ މާހައުލުގައި ނުވަތަ މަސައްކަތުގެ ސަބަބުން މީހަކަށް އަނިޔާއެއްވެ، ވަގުތީ ނުވަތަ ދާއިމީ ނުކުޅެދުންތެރިކަމެއް މެދުވެރިވެއްޖެނަމަ، އަދި މަސައްކަތްތެރިއެއްގެ ފުރާނަ ހިނގައްޖެނަމަ، ޚަރަދުތަކާއި ގެއްލުމުގެ ބަދަލު އެ މީހަކަށް ނުވަތަ އެ މީހެއްގެ ވާރިސުންނަށް ދޭންޖެހޭނެއެވެ.
މި ގަވާއިދުގެ ދަށުން، މަސައްކަތުގެ މާހައުލުގައި އަނިޔާއެއް ލިބިއްޖެނަމަ، ބޭސްފަރުވާގެ ހުރިހާ ޚަރަދަކާއި، މަސައްކަތަށް ނުނިކުމެވޭ ދުވަސްތަކުގެ އުޖޫރައާއި، ލިބުނު އަނިޔާގެ ސަބަބުން މެދުވެރިވި ނުކުޅެދުންތެރިކަމަށް ލިބޭ ގެއްލުމުގެ ބަދަލު ދޭންޖެހެއެވެ. ދާއިމީ ނުކުޅެދުންތެރިކަމެއް ދިމާވާ މަސައްކަތްތެރިއަކަށް މަދުވެގެން 10 އަހަރަށް ބަދަލު ނަގައިދޭންޖެހޭއިރު، މިފަދަ ހާލަތެއްގައި މަދުވެގެން އެއް މިލިއަން އަދި އެންމެ ގިނަވެގެން 19 މިލިއަން ރުފިޔާ ބަދަލުގެ ގޮތުގައި ދޭންޖެހެއެވެ.
މަސައްކަތް ހަވާލުކުރި ފަރާތުގެ އިހުމާލުން މުވައްޒަފު މަރުވެއްޖެނަމަ، އިހުމާލުގެ މިންވަރާއި މަސައްކަތްތެރިޔާގެ އުމުރާއި އުޖޫރައަށް ބަލައި ބަދަލު ދޭންޖެހޭނެއެވެ. މި ހާލަތުގައި އެންމެ ކުޑަމިނުން 1.46 މިލިއަން ރުފިޔާ އަދި އެންމެ ގިނަވެގެން 15.4 މިލިއަން ރުފިޔާ ބަދަލުގެ ގޮތުގައި ދޭންޖެހެއެވެ.
ނަމަވެސް، މަސައްކަތް ހަވާލުކުރި ފަރާތުގެ އިހުމާލަކާ ނުލައި ދިމާވާ އެކްސިޑެންޓެއްގެ ނުވަތަ ހާދިސާއެއްގެ ސަބަބުން މުވައްޒަފެއްގެ ފުރާނަ ގެއްލިއްޖެނަމަ، 50،000 ރުފިޔާ ވާރިސުންނަށް ބަދަލުގެ ގޮތުގައި ދޭންޖެހޭނެއެވެ. މި ގަވާއިދުގެ ސަބަބުން، ވަޒީފާގެ މާހައުލުގައި މުވައްޒަފުންގެ ސަލާމަތާއި ރައްކާތެރިކަން އިތުރަށް ކަށަވަރުކުރެވިގެންދާނެ ކަމަށް ބެލެވެއެވެ.
