ވިލިމާލޭގައި އަޅާ 100 އެނދުގެ ހޮސްޕިޓަލުގެ ފީސިބިލިޓީ ދިރާސާ ނިމިއްޖެއެވެ.
ޗައިނާ ސަރުކާރުގެ އެހީގައި ވިލިމާލޭގައި އަޅާ 100 އެނދުގެ ހޮސްޕިޓަލުގެ ފީސިބިލިޓީ ދިރާސާ ނިންމާލުމުގެ ސޮއިކުރުމުގެ ރަސްމިއްޔާތު ބުރާސްފަތި ދުވަހު މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގައި ބޭއްވުނެވެ.
މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބާއި ދިވެހިރާއްޖެއަށް ކަނޑައަޅުއްވާފައި ހުންނަވާ ޗައިނާގެ ސަފީރު ވަންގް ލިޝިން ފީސިބިލިޓީ ފައިންޑިންގްސްގެ މެމޮރަންޑަމްގައި ސޮއިކުރެއްވިއެވެ.
މި މެމޮރަންޑަމްގައި ސޮއިކުރުމުން މަޝްރޫޢުގެ ދެން އޮތް މަރުޙަލާ ކަމުގައިވާ ޑިޒައިން އަދި ޕްރޮކިއުމަންޓް މަރުޙަލާއަށް ދިއުމުގެ އަސާސް ޤާއިމްވެގެން ދިޔައެވެ.
ދަރުމަވަންތަ ހޮސްޕިޓަލުގެ ޗީފް އެގްޒެކެޓިވް އޮފިސަރ އިބްރާހީމް ޢަބްދުއްރައްޒާޤު ޙަލީމާއި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ އިސް ބޭފުޅުންނާއި ދިވެހިރާއްޖޭގައި ހުންނަ ޗައިނާ އެމްބަސީގެ އަދި މާލެ ސިޓީ ގުރޫޕް އޮފް ހޮސްޕިޓަލްސްގެ ބޭފުޅުން މި ސޮއިކުރުމުގެ ރަސްމިއްޔާތުގައި ބައިވެރިވެ ވަޑައިގަތެވެ. ވިލިމާލޭގައި އަޅާ ހޮސްޕިޓަލަކީ ޗައިނާ ސަރުކާރުން ދިވެހި ސަރުކާރަށް ދެއްވާ ހިލޭ އެހީގެ ދަށުން ކުރިއަށްގެންދާ މަޝްރޫޢެއްކަން ސަރުކާރުން ހާމަކޮށްފައިވެއެވެ.
ކޮންސްޓްރަކްޝަން މިނިސްޓަރު މުއްޠަލިބު ވިދާޅުވެފައިވަނީ ވިލިމާލޭގައި އަޅާ 100 އެނދުގެ ހޮސްޕިޓަލުގެ މަސައްކަތް 2 އަހަރު ތެރޭގައި ނިންމައި ޚިދުމަތް ދޭން ފެށުމަށް އަމާޒުކުރެވިފައިވާ ކަމަށެވެ.
ޕަބްއަދި ޓެންޑަރިންގ މަރުޙަލާ ނަގާނީ 6 މަހެއްހާ ދުވަސް ކަމަށާއި، މި މުއްދަތުގައި ޑިޒައިން މަސައްކަތް ނިންމައި، ޗައިނާގައި ބިޑް ކުރުމަށްފަހު މަސައްކަތް ކުރާނެ ކުންފުންޏެއް ހޮވޭނެ ކަމަށް އޭނާ ހާމަކުރައްވާފައިވެއެވެ.
މީގެ އިތުރުން، އޭނާ ވިދާޅުވެފައިވަނީ އިމާރާތް ކުރުމުގެ މަސައްކަތް ފެށުމަށް ބެލެވެނީ 2025 ގެ މެދުތެރޭގައި ކަމަށާއި، ހޮސްޕިޓަލް މަޝްރޫޢު 2 އަހަރު ތެރޭގައި ނިންމޭނެ ކަމަށެވެ.
މުއްޠަލިބު ވިދާޅުވީ 2027 ވަނަ އަހަރާ ހަމައަށް ރަނގަޅު ފެންވަރުގެ ޓަރޝަރީ ހޮސްޕިޓަލެއްގެ ގޮތުގައި ޚިދުމަތް ދޭން ފެށޭނެ ކަމަށް އުންމީދުކުރައްވާ ކަމަށެވެ.
