މި އަހަރުގެ ފެބްރުއަރީ މަހު ހުޅުމާލޭގެ ފަރަށް ގެއްލުން ދިން ޓަގު ބޯޓާއި ބާޖުގެ އޮޕަރޭޓަރަށް 29 މިލިއަން ރުފިޔާގެ ޖޫރިމަނާއެއް ކޮށްފިއެވެ.
ޓަގު ބޯޓު 'އަނާދީ' އާއި ބާޖު 'އޭއެމް މަނުމިތް' ވަނީ ފެބްރުއަރީ 21 ވަނަ ދުވަހު ހުޅުމާލޭގެ އުތުރު ފަރާތު ފަރަށް އަރާފައެވެ. މި އުޅަނދުތައް ފަރުން ނަގާފައިވަނީ އޭޕްރީލް 23 ވަނަ ދުވަހުއެވެ.
މި ހާދިސާއާ ގުޅިގެން އެންވަޔަރަންމަންޓް ޕްރޮޓެކްޝަން އޭޖެންސީ (އީޕީއޭ) އިން ވަނީ މި ދެ އުޅަނދުގެ އޮޕަރޭޓަރު ކަމުގައިވާ 'ދަ މިޑްލް އީސްޓް މެރިން، އެލްއެލްސީ' ޖޫރިމަނާ ކޮށްފައެވެ.
އީޕީއޭ އިން ބުނާ ގޮތުގައި، އެ އިދާރާއިން އުޅަނދުތަކުގެ އޮޕަރޭޓަރު ޢައްޔަންކުރި ސަރވޭޔަރުންނާ ގުޅިގެން ފަރަށް ލިބުނު ގެއްލުމުގެ އެސެސްމަންޓެއް ހަދާފައިވެއެވެ. މި އެސެސްމަންޓުން ދައްކާ ގޮތުގައި މި ހާދިސާގައި 1,159 އަކަފޫޓަށް ވުރެ ބޮޑު ސަރަހައްދެއްގެ ފަރު ހަލާކުވެފައިވެއެވެ.
އެހެންކަމުން، ތިމާވެށްޓަށް ގެއްލުން ދިނުމުގެ ސަބަބުން ޖޫރިމަނާކުރުމާއި ޒިންމާ ނެގުމާބެހޭ ގަވާއިދުގެ ދަށުން އޮޕަރޭޓަރަށް 29,201,946 ރުފިޔާ (ނަވާވީސް މިލިއަން ދެލައްކަ އެއްހާސް ނުވަސަތޭކަ ސާޅީސް ހަ ރުފިޔާ) ގެ ޖޫރިމަނާއެއް ކޮށްފައިވާ ކަމަށް އީޕީއޭ އިން ބުނެފައިވެއެވެ.
އޮކްޓޯބަރ 1 ވަނަ ދުވަހުން ފެށިގެން 30 ދުވަހުގެ ތެރޭގައި މި ޖޫރިމަނާ ދެއްކުމަށް އޮޕަރޭޓަރަށް އަންގާފައިވެއެވެ.
