ރުޕޭ ކާޑު ރާއްޖޭގައި ތަޢާރަފުވުމާއެކު އިންޑިއާގެ ފަތުރުވެރިންނަށް ރާއްޖޭގައި ފަސޭހަކަމާއެކު ފައިސާގެ މުޢާމަލާތްތައް ކުރެވޭނެ ކަމުގައި އިކޮނޮމިކް މިނިސްޓްރީން ބުނެފިއެވެ. މި ކާޑަކީ ދިވެހިރާއްޖޭގެ މާލީ ނިޒާމު އިތުރަށް ހަރުދަނާކޮށް، ވިޔަފާރީގެ މުޢާމަލާތްތަކުގައި ގުޅުން ބަދަހިކުރުމަށް އެޅުނު މުހިންމު ފިޔަވަޅެއް ކަމުގައި އެ މިނިސްޓްރީން ފާހަގަކޮށްފައިވެއެވެ.
އިންޑިއާގެ ފަތުރުވެރިންނަކީ ރާއްޖޭގެ ފަތުރުވެރިކަމުގެ ދާއިރާގައި މުހިންމު ދައުރެއް އަދާކުރާ ބައެއްކަން ފާހަގަކުރައްވައި، މި ކާޑުގެ ސަބަބުން އެ ޤައުމުގެ ފަތުރުވެރިންނަށް ރާއްޖޭގައި ފަސޭހަކަމާއެކު ފައިސާގެ މުޢާމަލާތްތައް ހިންގުމަށް މަގުފަހިވާނެ ކަމަށް އިކޮނޮމިކް މިނިސްޓްރީން ވިދާޅުވެފައިވެއެވެ. މީގެ އިތުރުން، މި ކާޑުގެ ސަބަބުން އިންޑިއާއާއި ދިވެހިރާއްޖެއާ ދެމެދު ކުރެވޭ މާލީ މުޢާމަލާތްތައް ފަސޭހަވެ، ވިޔަފާރިތައް ފުޅާކުރުމަށް މަގުފަހިވެގެންދާނެ ކަމަށާއި، ޚާއްޞަކޮށް ކުދި އަދި މެދުފަންތީގެ ވިޔަފާރިތަކަށް އިންޑިއާއާއެކު މަސައްކަތްކުރުމަށް ލުއިފަސޭހަތަކެއް ލިބިގެންދާނެ ކަމަށްވެސް އެ މިނިސްޓްރީން ފާހަގަކުރައްވާފައިވެއެވެ.
ޑިޖިޓަލް ޕޭމަންޓް ސިސްޓަމްތަކާއި ޚިދުމަތްތައް އިތުރަށް ފުޅާކުރުމުގެ މަޤްޞަދުގައި ދިވެހި ސަރުކާރާއި ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އާ ދެމެދު އެމްއޯޔޫއެއްގައި ސޮއިކޮށް، މިހާރު މަސައްކަތް ކުރެވެމުންދާ ކަމަށްވެސް އިކޮނޮމިކް މިނިސްޓްރީން ހާމަކުރައްވާފައިވެއެވެ.
ރާއްޖޭގައި ރުޕޭ ކާޑު ބޭނުންކުރެވޭނެ އިންތިޒާމު ހަމަޖެހިގެން ދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، އެ ޤައުމުގެ ބޮޑުވަޒީރު ނަރެންދްރަ މޯދީއާ އެކު ބޭއްވެވި ބައްދަލުވުމަށްފަހުގައެވެ. މި ބައްދަލުވުމަށްފަހު ދެ ބޭފުޅުން ދެއްވި ބަޔާނުގެ ކުރިން، ރާއްޖޭގައި ހެދުނު ރުޕޭގެ ފުރަތަމަ ޓްރާންސެކްޝަން ވަގުތުން ދައްކާލެވުނެވެ. ރާއްޖެއަށް ރުޕޭ ކާޑު ތަޢާރަފުވުމާ ގުޅިގެން، ބޭންކް އޮފް މޯލްޑިވްސްގެ އޭޓީއެމްތަކާއި ޕީއޯއެސް މެޝިންތަކުގެ އިތުރުން އެހެނިހެން ޑިޖިޓަލް ޗެނަލްތަކުގައިވެސް މި ކާޑު ބޭނުންކުރެވޭނެއެވެ.
