އަގުބޮޑުކޮށް ސްޕެއަރ ގަތްކަމަށް ބުނެ އޮންލައިން ނޫހެއްގައި ޝާއިޢުކޮށްފައިވާ ޚަބަރެއް ފެނަކަ ކޯޕަރޭޝަންއިން ދޮގުކޮށްފިއެވެ. އެ ޚަބަރުގައި ބުނެފައިވަނީ ފެނަކައިން ފޭކް ސްޕެއާތަކެއް ބޮޑު އަގުގައި ގަނެފައިވާ ކަމަށެވެ. ނަމަވެސް ފެނަކައިން ބުނެފައިވަނީ މިއީ އަސްލެއްނެތް ސާފު ދޮގެއް ކަމަށެވެ.
ފެނަކައިން ހާމަކުރި ގޮތުގައި، ކުންފުންޏަށް ބޭނުންވާ ސްޕެއާ ގަތުމުގެ މަސައްކަތް މިހާރު ވަނީ އަދި ޓެންޑަރިންގ މަރުޙަލާގައެވެ. އެހެންކަމުން، ޚަބަރުގައި ބުނާފަދަ އެއްވެސް މުދަލެއް ގަނެފައި ނުވާ ކަމަށާއި، އެކަމަށް އެއްވެސް ފައިސާއެއް ދައްކާފައި ނުވާ ކަމަށްވެސް ފެނަކައިން ބުނެފައިވެއެވެ.
ފެނަކައިން އިތުރަށް ބުނެފައިވަނީ، ކުންފުންޏަށް މުދާ ގަންނަނީ ކަނޑައެޅިފައިވާ އިޖުރާއަތުތައް ފުރިހަމަކުރުމާއެކު، މުދަލުގެ ފެންވަރާއި އަގު، އަދި ބޭނުންވާ އަސާސީ ޚިދުމަތުގެ ޙާލަތަށް ރިޢާޔަތްކޮށްގެން ކަމަށެވެ. އައު މެނޭޖްމަންޓުން ހަވާލުވުމަށްފަހު، ކުރިން ފެންވަރު ދަށް ޚިދުމަތާއި މުދާ ފޯރުކޮށްދެމުންދިޔަ ފޭކް ކުންފުނިތައް ދޫކޮށްލާފައިވާ ކަމަށްވެސް ފެނަކައިން ފާހަގަކޮށްފައިވެއެވެ.
މި ފިޔަވަޅު އެޅުމުގެ ސަބަބުން ބައެއް ފަރާތްތަކުގެ ނުރުހުން ލިބޭނެކަން އެނގިތިބެ، ކުންފުންޏާއި ރައްޔިތުންގެ ޙައްޤުގައި މިކަން ކުރިއަށް ގެންދިޔަ ކަމަށް ފެނަކައިން ބުނެފައިވެއެވެ. މިގޮތުން، ދައުރުވަމުންދާ ޚަބަރަކީ ނުހިނގާ ކަމެއް ހިނގި ކަމެއްގެ ގޮތުގައި ދައްކައި، އޮޅުވާލުމަށް މަސައްކަތްކޮށްފައިވާ ޚަބަރެއް ކަމަށް ފެނަކައިން ދެކޭ ކަމަށްވެސް އެ ކުންފުނިން ނެރުނު ބަޔާނުގައި ބުނެފައިވެއެވެ.
