އިސްރާއީލުން މެދުއިރުމަތީގައި ހިންގަމުންދާ ގަތުލުއާންމު ތަކާއެކުވެސް، އެމެރިކާއިން އަނެއްކާވެސް އެގައުމަށް 8.7 ބިލިއަން ޑޮލަރުގެ އަސްކަރީ އެހީ ދީފިއެވެ.
އިސްރާއީލުން ބުރާސްފަތި ދުވަހު ބުނެފައިވަނީ އެ ޤައުމުގެ މިހާރު ހިނގަމުންދާ އަސްކަރީ މަސައްކަތްތަކަށް އެހީތެރިވުމަށާއި، އެ ސަރަހައްދުގައި އަސްކަރީ ގޮތުން އިސްރާއީލުގެ ބާރު ދަމަހައްޓަން 8.7 ބިލިއަން ޑޮލަރުގެ އެހީ ޕެކޭޖެއް އެމެރިކާއިން ކަށަވަރު ކޮށްފައިވާ ކަމަށެވެ.
މި ޕެކޭޖުގައި ހިމެނެނީ ހަނގުރާމައިގެ ވަގުތު ކޮންމެހެން ބޭނުންވާ ތަކެތި ހޯދުމަށް 3.5 ބިލިއަން ޑޮލަރު (މިހާރުވެސް ލިބި، މުހިންމު އަސްކަރީ ތަކެތި ގަތުމަށް ކަނޑައަޅާފައިވާ) އާއި، އައަން ޑޯމް މިސައިލް ދިފާއީ ނިޒާމާއި، ޑޭވިޑްސް ސްލިންގް އަދި ޒަމާނީ ލޭޒަރ ނިޒާމް ފަދަ ވައިގެ ދިފާއީ ނިޒާމުތަކަށް ކަނޑައަޅާފައިވާ 5.2 ބިލިއަން ޑޮލަރެވެ. މިވަގުތު އިސްރާއީލުން ދެ ދިމާލެއްގައި ހަނގުރާމަކުރަމުންދެއެވެ. އެއީ ޣައްޒާގައި ފަލަސްތީނު އިސްލާމީ ޖަމާޢަތް ހަމާސްއާ ދެކޮޅަށާއި، ލުބުނާނުގައި އީރާނުގެ ބާރު ލިބިފައިވާ ހިޒްބުއްލާއާ ދެކޮޅަށެވެ.
އިސްރާއީލުގެ ދިފާއީ މިނިސްޓްރީން ނެރުނު ބަޔާނެއްގައި ބުނެފައިވާ ގޮތުގައި، މި އެހީގެ އިއުލާނު ކުރެވިފައިވަނީ އިސްރާއީލުގެ ދިފާއީ މިނިސްޓްރީގެ ޑިރެކްޓަރ ޖެނެރަލް އެޔާލް ޒަމީރާއި އެމެރިކާގެ ދިފާއީ އިސްވެރިންނާ ދެމެދު ޕެންޓަގަންގައި ކުރެވުނު މަޝްވަރާތަކަކަށް ފަހުއެވެ. މި މަޝްވަރާތަކުގައި އެމެރިކާގެ ފަރާތުން ބައިވެރިވެވަޑައިގެންނެވި ފަރާތްތަކުގެ ތެރޭގައި އެކްޓިންގ އަންޑަރ ސެކްރެޓަރީ އޮފް ޑިފެންސް ފޯ ޕޮލިސީ އަމާންޑާ ޑޯރީ ހިމެނެއެވެ.
"މި ބޮޑު އިންވެސްޓްމަންޓުން އައަން ޑޯމް އަދި ޑޭވިޑްސް ސްލިންގް ފަދަ މުހިންމު ނިޒާމުތައް ވަރަށް ބޮޑަށް ހަރުދަނާވެގެންދާނެއެވެ. އަދި މިހާރު ތަރައްޤީކުރުމުގެ ފަހު މަރުހަލާގައިވާ ޒަމާނީ ހައި-ޕަވަރޑް ލޭޒަރ ދިފާއީ ނިޒާމެއްގެ ތަރައްޤީއަށްވެސް މިއިން އެހީތެރިވެދޭނެއެވެ،" މިނިސްޓްރީގެ ބަޔާނުގައި ބުނެފައިވެއެވެ.
އިސްރާއީލާއި އެމެރިކާއާ ދެމެދު އޮތް "ވަރުގަދަ އަދި ދެމެހެއްޓެނިވި ސްޓްރެޓެޖިކް ގުޅުމާއި، އިސްރާއީލުގެ ސަލާމަތާމެދު ދަގަނޑުގެ ނަރެކޭ އެއްފަދަ ވަރުގަދަ އިލްތިޒާމް" މި އެއްބަސްވުމުން ހާމަވާކަމަށް މިނިސްޓްރީން ބުނެފައިވެއެވެ. މީގެ ތެރޭގައި ޚާއްސަކޮށް އީރާނާއި އީރާނުގެ ބާރު ލިބިފައިވާ މިލިޝިއާތަކުން އެ ސަރަހައްދުގެ ސަލާމަތަށް ކުރިމަތިވާ ނުރައްކާތަކަށް އަމާޒުކުރެވޭ ކަންކަން ހިމެނެއެވެ.
