މީގެ ދެދުވަސްކުރިން އިސްރާއީލުން ލުބުނާނަށް ދޭންފެށި ހަމަލާތަކުގައި މިހާތަނަށް ލުބުނާނުގެ 700 އަށްވުރެ ގިނަ މީހުން މަރުވެއްޖެއެވެ. އަދި ފާއިތުވި 24 ގަޑިއިރު އެކަނިވެސް އިސްރާއީލުގެ ހަމަލާތަކުގައި 92 މީހަކު ވަނީ މަރުވެފައެވެ.
އިސްރާއީލުން ހިޒްބުއްލާއާއި ދެކޮޅަށް ކުރަމުންދާ ހަނގުރާމަ ހުއްޓާލުމަށް ބައިނަލްއަޤްވާމީ ފަރާތްތަކުން ގޮވާލާފައިވާ ގޮވާލުންތަކާ އިސްރާއީލުން ވަނީ ދެކޮޅު ހަދާފައެވެ.
ލުބުނާނުގައި ހަނގުރާމަ ހުއްޓާލުމަށް އެމެރިކާގެ އިސްނެގުމުގެ ދަށުން ބައިނަލްއަޤްވާމީ ފަރާތްތަކުން ގޮވާލާފައިވާއިރު، އެގޮވާލުންތަކަކީ އިސްރާއީލާއެކު "ވިލަރެސްކޮށްގެން" ކުރި ކަމެއްކަމަށް ވައިޓްހައުސްއިން ބުނެފައިވެއެވެ. އެހެންނަމަވެސް އިސްރާއީލުން ވަނީ މި ހުށަހެޅުން ބަލައިނުގަނެ ދޫކޮށްލާފައެވެ.
އެމެރިކާގެ ޑިފެންސް ސެކްރެޓަރީ ލޮއިޑް އޯސްޓިން ވިދާޅުވެފައިވަނީ އިސްރާއީލަށް އައު 8.7 ބިލިއަން ޑޮލަރުގެ އަސްކަރީ އެހީއެއް ދިނުމަށް ހަމަޖެހިފައިވާއިރު އެމެރިކާއިން އިސްރާއީލަށް އެހީތެރިވުން ކުރިއަށް ގެންދާނެ ކަމަށެވެ. އަދި ޣައްޒާއާއި ލުބުނާނަށް އިސްރާއީލުން ކުރާ ހަމަލާތަކުގައި "ރަތް ރޮނގު" ތަކެއް ނެތް ކަމަށްވެސް އޭނާ ވިދާޅުވިއެވެ.
އިސްރާއީލުން ލުބުނާނަށް ހަމާލާދެމުން ދާއިރު، އެގައުމުން އަދިވެސް ދަނީ ފަލަސްތީނުގެ ޢައްޒާއަށްވެސް އުދުވާނީ ހަމަލާތައް ދެމުންނެވެ. އެގޮތިން، އިސްރާއީލުން ޣައްޒާއަށް ދެމުންދާ ހަމަލާތަކުގައި މިހާތަނަށް މަދުވެގެން 41,534 މީހުން ޝަހީދުވެސް، 96,092 މީހުން ޒަޚަމްވެފައިވެއެވެ.
އިސްރާއީލުގައި އޮކްޓޯބަރު 7 ވަނަ ދުވަހު ހަމާސްއިން ދިން ހަމަލާގައި މަދުވެގެން 1,139 މީހުން މަރުވެފައިވާއިރު، 200 އަށްވުރެ ގިނަ މީހުން ރަހީނު ކޮށްފައިވެއެވެ.
