ރިޒޯޓު ތަރައްގީކުރުމަށް ދޫކޮށްފައިވާ ރަށްތަކުގެ ތެރެއިން ހިންގަމުންދާ ރަށެއްގެ ފެންވަރު މަތިކުރުމަށްޓަކައި މުޅި ތަން ބަންދުކުރާނަމަ، ތިން އަހަރަށް ކުލި ފަސްކޮށްދިނުމުގެ އިޚުތިޔާރު ޓޫރިޒަމް މިނިސްޓްރީއަށް ލިބިގެންދާ ގޮތަށް ގަވައިދު އިސްލާހު ކޮށްފިއެވެ.
މީގެ ކުރިން މިފަދަ ބޭނުންތަކަށް ރިޒޯޓު ބަންދުކުރެވޭނީ ދެ އަހަރަށް ކަމުގައި ވީނަމަވެސް، މިހާރު އެ މުއްދަތު އިތުރުކޮށް، 36 މަސްދުވަހަށް ބަންދުކުރުމުގެ ހުއްދަ ދެވޭނެއެވެ. އަދި އިތުރު ހަ މަސްދުވަސް (ޖުމްލަ 42 މަސްދުވަސް) އިތުރުކުރުމުގެ އިޚުތިޔާރުވެސް މިނިސްޓްރީއަށް ލިބިގެންދާނެއެވެ.
މި އިތުރު މުއްދަތު ދިނުމުގައި ބަލާނީ 36 މަސްދުވަސް ހަމަވާއިރު، އެ ތަނެއް ހިންގަން ނުފެށި، މަސައްކަތް ކުރުމަށް ބޭނުންވާ ތަކެއްޗާއި، މަސައްކަތްތެރިން ތަނުގައި ތިބިކަމުގެ އިޤުރާރެއް މިނިސްޓްރީއަށް ހުށަހެޅުމުންނެވެ. ނަމަވެސް، މި އިޤުރާރާ ޚިލާފަށް އަމަލުކޮށްފައިވާކަން ފާހަގަކުރެވިއްޖެނަމަ، ދީފައިވާ ހުއްދަ ބާޠިލުކުރުމުގެ އިޚުތިޔާރުވެސް މިނިސްޓްރީއަށް ލިބިގެންވެއެވެ.
މި އައު ގަވާއިދު ވަނީ ދިވެހި ސަރުކާރުގެ ގެޒެޓުގައި ޝާއިޢުކޮށް، މިހާރު އަމަލުކުރަން ފަށާފައެވެ.
