ރައީސް ކަމަށް މީހަކު ހޮވުމަށްޓަކައި ޝްރީ ލަންކާގައި ބޭއްވުނު އިންތިޚާބުގައި ވޯޓު ލުން ނިމުމާއެކު، އެ ޤައުމުގެ ހުރިހާ ސަރަހައްދެއްގައިވެސް އެއް ރޭގެ މުއްދަތަށް ކަރްފިޔު ނެރެފިއެވެ. މި އިންތިޚާބު ބޭއްވުނީ އެ ޤައުމުގައި ކުރިން ދިމާވެފައިނުވާ ފަދަ އިޤްތިޞާދީ ހީނަރުކަމެއް ދިމާވެ، އޭގެ ސަބަބުން އާންމުންގެ މުޒާހަރާތަކެއް ހިނގައި، އޭރުގެ ރައީސް ގޮޓަބާޔާ ރާޖަޕަކްސާ ޤައުމުން ފިލަން ޖެހި، އެ ޤައުމު މި ދަތި ހާލަތުން އަރައިގަތުމަށް މަސައްކަތް ކުރަމުންދާ ދަނޑިވަޅެކެވެ.
މިނިވަން އިލެކްޝަންސް ކޮމިޝަނުން މިއީ ޝްރީ ލަންކާގެ އިންތިޚާބުތަކުގެ ތާރީޚުގައި އެންމެ ސުލްޙަވެރިކަމާއެކު ކުރިއަށްދިޔަ އިންތިޚާބު ކަމަށް ބުނުމާއެކު، ފުލުހުން "އާންމުންގެ ސަލާމަތާއި ރައްކާތެރިކަމަށްޓަކައި" އަށް ގަޑިއިރުގެ ކަރްފިޔުއެއް ނެރުނެވެ. ވޯޓު ފޮށިތައް ބަންދުވުމުގެ އެއް ގަޑިއިރު ކުރިން ވޯޓު ލުމުގެ ނިސްބަތް ވަނީ ގާތްގަނޑަކަށް 70 އިންސައްތައިގައި ކަމަށް އިލެކްޝަން ކޮމިޝަންގެ އޮފިޝަލެއް ވަގުތީ އަދަދުތަކުގެ މައްޗަށް ބިނާކޮށް އޭއެފްޕީ އަށް މައުލޫމާތު ދީފައިވެއެވެ.
ޝްރީ ލަންކާގައި ރައީސަކު ހޮވުމަށް ބޭއްވޭ އިންތިޚާބެއްގައި އެންމެ ގިނަ މީހުން ވޯޓު ލާފައިވަނީ 2019 ވަނަ އަހަރު ބޭއްވުނު އިންތިޚާބުގައި ކަމަށްވާއިރު، އެ އިންތިޚާބުގައި 83.72 އިންސައްތަ މީހުން ވޯޓު ލާފައިވެއެވެ.
މިފަހަރުގެ އިންތިޚާބު އާންމު ގޮތެއްގައި ދެކެނީ ރާޖަޕަކްސާގެ ފަހަތުން ވެރިކަމަށް އައި ރަނިލް ވިކްރަމަސިންގޭގެ މައްޗަށް ހިންގޭ ރެފަރެންޑަމެއްގެ ގޮތުގައެވެ. އައިއެމްއެފްގެ އެހީތެރިކަމާއެކު ތަންފީޒުކުރި ސިޔާސަތުތަކާއެކު ވިކްރަމަސިންގޭ ވަނީ ކޮންމެވެސް ވަރަކަށް އިސްތިޤްރާރުކަން ގެނެސްދީފައެވެ. ނަމަވެސް ޓެކްސް ބޮޑުކުރުން ފަދަ ފިޔަވަޅުތަކުގެ ސަބަބުން ދިރިއުޅުމުގެ ކަންކަން ހަމަޖެއްސުމުގައި މިލިއަނުން މީހުންނަށް ދަތިތަކާ ކުރިމަތިލާން ޖެހި، ގިނަ ވޯޓުދޭ ފަރާތްތަކުގެ މެދުގައި މި ފިޔަވަޅުތައް މަޤްބޫލުވެފައެއް ނުވެއެވެ.
އިޤްތިޞާދީ ހީނަރުކަމުގެ ސަބަބުން ޖަނަތާ ވިމުކްތި ޕެރަމުނާ (ޖޭވީޕީ) ގެ ލީޑަރު އަނުރާ ކުމާރާ ދިސަނާޔަކޭގެ މަޤްބޫލުކަން ވަނީ އިތުރުވެފައެވެ. މި ޕާޓީން 1970 އަދި 1980 ގެ އަހަރުތަކުގައި ވަނީ ދެ ފަހަރެއްގެ މަތިން ބަޣާވާތްތަކެއް ހިންގައި، އެ ބަޣާވާތްތަކުގައި 80،000 އަށް ވުރެ ގިނަ މީހުން މަރުވެފައެވެ. އަދި ފާއިތުވި ޕާލަމެންޓަރީ އިންތިޚާބުގައި މި ޕާޓީއަށް ލިބުނީ 4 އިންސައްތައަށް ވުރެ މަދުން ވޯޓެވެ.
