ދިވެހިރާއްޖެ އަބަދުވެސް އދ. ގައި ޙަރަކާތްތެރި ޤައުމެއްގެ ގޮތުގައި ފެނިގެންދިޔުމަކީ އެމަނިކުފާނުގެ އުންމީދު ކަމުގައި ކުރީގެ ފޮރިން މިނިސްޓަރ އަދި އދ. ގެ އާންމު މަޖިލީހުގެ ރައީސްކަން ކުރެއްވި އަބްދުﷲ ޝާހިދު ވިދާޅުވެއްޖެއެވެ.

ދިވެހިރާއްޖެ އދ. ގެ މެންބަރަކަށްވީތާ 59 އަހަރު ފުރުމާ ގުޅިގެން އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި ޝާހިދު ފާހަގަކުރެއްވީ ވޭތުވެދިޔަ އަހަރުތަކުގައި ދިވެހިރާއްޖެއިން ވަނީ އދ. ގައި ބައިނަލްއަޤްވާމީ ގޮތުން މުހިންމު ކަންކަމުގައި ލީޑަރޝިޕް ދައްކައި، ބައިވެރިވެ، އެހީތެރިކަން ފޯރުކޮށްދީފައި ކަމަށެވެ.

ޝާހިދު އިތުރަށް ވިދާޅުވެފައިވަނީ އދ. ގައި ހޭދަކުރެވުނު މި ދުވަސްތަކުގެ ތަޖުރިބާގެ އަލީގައި، އދ. ގެ އުސޫލުތަކާ އެއްގޮތްވާގޮތުގެ މަތިން ބައިނަލްއަޤްވާމީ މައިދާނުގައި ޙަރަކާތްތެރި ޤައުމެއްގެ ގޮތުގައި ދިވެހިރާއްޖެ ދެމިއޮތުމަކީ އެމަނިކުފާނުގެ އެދުމެއް ކަމުގައެވެ.

އަދި ކުޑަކުޑަ ޖަޒީރާ ޤައުމެއްގެ ހައިސިއްޔަތުން ދިވެހިރާއްޖެއިން ވަނީ އދ. ގައި ގިނަގުނަ މުހިންމު މަސައްކަތްތަކެއް ކޮށްފައިކަން ވެސް ފާހަގަކުރެއްވިއެވެ.

މީގެ އިތުރުން، ދުނިޔޭގެ ކުދި ޖަޒީރާ ޤައުމުތަކުގެ ތެރެއިން ދިވެހިރާއްޖެއަކީ އދ. ގެ މެންބަރަކަށްވި އެންމެ ފުރަތަމަ ޤައުމުތަކުގެ ތެރޭގައި ހިމެނޭ ޤައުމެއްކަން ވެސް ޝާހިދު ފާހަގަކުރެއްވިއެވެ.