ކޮރަޕްޝަނަށް މަގުފަހިވާ ގޮތަށް ގދ. ތިނަދޫ ސިޓީއަށް ފެން ޕްލާންޓެއް ހޯދި ކަމަށް ބުނެ ފަތުރަމުން ދާ ހަބަރަކީ ދޮގު ހަބަރެއް ކަމަށް ފެނަކަ ކޯޕަރޭޝަންއިން ބުނެފިއެވެ. ފެނަކައިން ނެރުނު ނޫސް ބަޔާނެއްގައި ބުނެފައި ވަނީ އެ ފެން ޕްލާންޓް ހޯދުމުގެ މަސައްކަތް ކޮށްފައި ވަނީ އެ ކުންފުނީގެ ޕްރޮކިއުމަންޓް ގަވައިދާ އެއްގޮތަށް ކަމަށް ފެނަކައިން ހާމަކޮށްފައިވެއެވެ.
ފެނަކައިން ފާހަގަކުރި ގޮތުގައި، އެ ކުންފުނިން ކަރަންޓާއި ފެނާއި ނަރުދަމާގެ ހިދުމަތް ދޭ ރަށްރަށުގެ ތެރެއިން ކްރިޓިކަލް ހާލަތެއްގައި 7 ރަށެއް އޮތް ކަމަށާއި، އޭގެތެރެއިން ތިނަދޫ އަކީ އެންމެ ބޮޑު އާބާދީއެއް އޮތް ރަށް ކަމަށް ބުނެފައިވެއެވެ. އާބާދީގެ ޑިމާންޑާ އެއްވަރަށް ފެން ފޯރުކޮށްދިނުމުގައި އެންމެ ބޮޑު ދަތިކަމެއް ކުރިމަތިވެފައި ވަނީ ވެސް އެ ރަށަށް ކަމަށް ފެނަކައިން ފާހަގަކޮށްފައިވެއެވެ.
ފެނަކައިން އިތުރަށް ބުނެފައިވާ ގޮތުގައި، ތިނަދޫގައި މިހާރު ހިދުމަތް ދެމުންދާ ފެން ޕްލާންޓުން އެކަނި ހިދުމަތް ދޭން ޖެހުމުގެ ސަބަބުން، ފާއިތުވި 2 މަސްތެރޭ 3 ފަހަރެއްގެ މަތިން އަމިއްލަ ފަރާތަކުން ފެން ހޯދަން ޖެހިފައިވެއެވެ. މި މުއްދަތުގައި ތިނަދޫ ސިޓީއަށް ޖުމްލަ 4.5 މިލިއަން ރުފިޔާގެ ފެން ފޯރުކޮށްދޭން ޖެހުނު ކަމަށްވެސް އެ ކުންފުނިން ހާމަކޮށްފައިވެއެވެ.
މި މައްސަލައަށް ހައްލު ހޯދުމަށްޓަކައި، ފެން ޕްލާންޓް ހޯދުމަށް އެމްޑަބްލިއުއެސްސީ އާއި ސްޓެލްކޯއަށް ހުށަހެޅި ކަމަށާއި، އެމްޑަބްލިއުއެސްސީން ބުނެފައިވަނީ 5 ހަފްތާ (35 ދުވަސް) ހޭދަވާނެ ކަމަށް ކަމަށާއި ސްޓެލްކޯއިން ބުނެފައިވަނީ 180 ދުވަސް ހޭދަވާނެ ކަމަށް ފެނަކައިން ހާމަކޮށްފައިވެއެވެ. އަދި އެ ކުންފުނީގެ ވެންޑަރުންގެ ތެރެއިން އަމިއްލަ ގޮތުން މި ހިދުމަތް ދޭ ކުންފުނިތަކަށް ދެ ފަހަރު ފުރުސަތު ދިނުމުން، ކޯޓޭޝަން ހުށަހެޅީ އެންމެ ފަރާތަކުން ކަމަށާއި، އެ ފަރާތުން ހުށަހެޅި އަގާ މެދު މަޝްވަރާކޮށް އަގު ކުޑަކޮށްފައިވާ ކަމަށް ފެނަކައިން ބުނެފައިވެއެވެ.
ފެނަކައިން އިތުރަށް ބުނެފައިވަނީ، ތިނަދޫ ސިޓީއަށް ހޯދި ފެން ޕްލާންޓް ހޯދާފައިވަނީ އެ ކުންފުނީގެ ޕްރޮކިއުމަންޓް އުސޫލުތަކުގެ ތެރެއިން ކަނޑައެޅިފައިވާ އިޖުރާއަތްތައް ފުރިހަމަކޮށްގެން ކަމަށެވެ. އަދި މި ފެން ޕްލާންޓް ތިނަދޫ ސިޓީގައި އިންސްޓޯލް ކުރެވުމުން 600 ޓަނުގެ ފެން އުފެއްދޭނެ ކަމަށްވެސް ފެނަކައިން ބުނެފައިވެއެވެ.
ފެނަކައިން އިލްތިމާސްކޮށްފައިވަނީ، އެ ކުންފުންޏާ މެދު ރައްޔިތުންގެ އިތުބާރު ގެއްލޭ ގޮތަށް ހަބަރު ނުފެތުރުމަށެވެ. އަދި ސިޔާސީ ފަރާތްތަކުން ރަށުތެރޭގައި ހަލަބޮލިކަން އުފެއްދުމަށާއި، ހިދުމަތަށް ބުރޫ އަރާފަދަ ގޮތަކަށް އަމަލުތައް ބަހައްޓައިގެން ތިނަދޫގައި ކުރަމުންދާ މަސައްކަތް ހުއްޓުވުމަށް ކުރަމުންދާ މަސައްކަތް ކާމިޔާބު ވިޔަ ނުދޭނެ ކަމަށްވެސް ފެނަކައިން ބުނެފައިވެއެވެ.
ނަމަވެސް، ފެނަކައިން މި ބަޔާން ނެރުނު އިރު، އެޗްކިއު ހޯލްޑިންގްސް ޕްރައިވެޓް ލިމިޓެޑް ކިޔާ ކުންފުންޏަކަށް ދީގެން ފެނަކައިން ފެން ޕްލާންޓް ގަނެފައިވަނީ، 5 ހަފްތާ ހޭދަވި ނަމަވެސް އެމްޑަބްލިއުއެސްސީން ހުށަހެޅި 7 މިލިއަން ރުފިޔާއަށް ވުރެ 6 މިލިއަން ރުފިޔާ ބޮޑުކޮށް، ޖުމްލަ 13.6 މިލިއަން ރުފިޔާއަށް ކަމަށް ފާހަގަކުރެވެއެވެ.
