ތައިލޭންޑުގެ އާ ޚާރިޖީ ވަޒީރަށް ޒަމީރު މަރުހަބާ ވިދާޅުވެއްޖެއެވެ. ތައިލޭންޑުގެ އާ ޚާރިޖީ ވަޒީރަށް މޫސާ ޒަމީރު ފޮނުއްވި ތަހުނިޔާގެ މެސެޖުގައި ވިދާޅުވެފައިވަނީ ތައިލެންޑާއި ރާއްޖެއާ ދެމެދު އޮތް ގުޅުން އިތުރަށް ވަރުގަދަ ކުރުމަށްޓަކައި، ދެ ޤައުމަށް ފައިދާކުރަނިވި ދާއިރާތައް ދެނެގަނެ، އެ ދާއިރާތަކުން އިތުރަށް މަސައްކަތް ކުރުމަކީ ވަރަށް ބޮޑު އުންމީދެއް ކަމަށެވެ.
ތައިލެންޑްގެ ޚާރިޖީ ވަޒީރުކަމަށް މަރިސް ސަންގިއަމްޕޮންގްސާ އަލުން އައްޔަންކުރެއްވުމާ ގުޅިގެން، ވަޒީރު ޒަމީރު ފޮނުއްވި މެސެޖުގައި ވިދާޅުވެފައިވަނީ، މި މަޤާމަށް އަލުން ޢައްޔަންކުރެއްވުމާ ގުޅިގެން ތަހުނިޔާ ދެންނެވުމަކީ ލިބޭ ވަރަށް ބޮޑު އުފަލެއް ކަމަށެވެ.
ވަޒީރު ޒަމީރު އިތުރަށް ފާހަގަކުރެއްވި ގޮތުގައި ރާއްޖެއާއި ތައިލެންޑްގެ ޒަމާންވީ ގުޅުމަކީ އިޙްތިރާމާއި އިތުބާރުގެ މައްޗަށް ބިނާވެފައިވާ ގުޅުމެކެވެ. އަދި ފާއިތުވީ އަހަރުތަކުގައި ދެޤައުމުގެ ރައްޔިތުންގެ މެދުގައި އާލާވެ ބަދަހިވަމުން އަންނަ ގާތް ރަޙްމަތްތެރިކަމުގެ ސަބަބުން މި ގުޅުން އިތުރަށް ހަރުދަނާވެފައިވާ ކަމަށްވެސް ޒަމީރު ވިދާޅުވިއެވެ.
މީގެއިތުރުން، ޒަމީރު ވަނީ ތައިލެންޑުގެ ރައްޔިތުންނަށް އިތުރު ކުރިއެރުމާއި އުފާފާގަތިކަން ލިބުމަށް އެދިވަޑައިގަންނަވާ ކަމަށް ވިދާޅުވެފައެވެ.
