މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ކ. ކަނޑުއޮތްގިރީގައި ކުރިއަށް ގެންދިޔަ އޮޕަރޭޝަން ހުއްޓާލައި، އެތަން ބަންދުކޮށްފިއެވެ.
މިއަދު ނޫސްވެރިންނަށް މަޢުލޫމާތު ދެއްވަމުން ފިޝަރީޒް މިނިސްޓަރު އަޙްމަދު ޝިޔާމް ވިދާޅުވީ، މި މަހުގެ ހަތަރުވަނަ ދުވަހުން ފެށިގެން ކަނޑުއޮތްގިރި ވަނީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ބޭނުމަށް އެ އިދާރާއާ ހަވާލުކޮށްފައި ކަމަށެވެ.
ކަނޑުއޮތްގިރީގައި ކުރަމުން ދިޔަ މަސައްކަތްތައް ކުރިއަށް ގެންދިއުމަށްޓަކައި، ހުޅުމާލޭގައި މަސްވެރިން މިހާރުވެސް ބޭނުންކުރާ ބަނދަރާ ކައިރިން ބިމެއް ހޯދުމުގެ މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ. ނަމަވެސް، ހުޅުމާލޭގައި މި މަސައްކަތް ފެށޭނެ ވަކި ތާރީޚެއް އަދި ކަނޑައެޅިފައި ނުވާކަން ފާހަގަކުރެއްވިއެވެ.
"ކަނޑުއޮތްގިރީގައި ދިގު މުއްދަތަކަށް މަސައްކަތްތައް ކޮށްފައިވީ ނަމަވެސް އެ ރަށުން މަސްވެރިންނަށް ބޭނުންވި ހައްލުތަކެއް ނުލިބޭ،" ޝިޔާމް ވިދާޅުވިއެވެ. އަދި ހުޅުމާލޭގައި މި މަސައްކަތްތައް ފެށުމަށް ބޭނުންވާ މާލީ އެހީ ލިބިފައިވާކަންވެސް އޭނާ ފާހަގަކުރެއްވިއެވެ.
މިފްކޯއިން ކަނޑުއޮތްގިރީގައި ކުރި މައިގަނޑު މަސައްކަތަކީ މަސް ކާރުޚާނާއެއް ހިންގުމެވެ. މިނިސްޓަރު ޝިޔާމް ވިދާޅުވިގޮތުގައި، ކަނޑުއޮތްގިރިއަކީ މަސްވެރިންގެ އަތުން މަސް ގަނެ، އޭގެ އުފެއްދުންތައް އުފައްދާ ތަނަކަށްވީ ނަމަވެސް، މިހާރު އެ ރަށުގެ އެއްގަމު ތޮށި ހަލާކުވެ، ބަނދަރު ސަރަޙައްދު ތިލަވެފައިވާތީ، މަސްދޯނިތައް ކައިރިކުރުމަށް ބޮޑެތި ދަތިތަކެއް ހުރިކަން ފާހަގަކުރެއްވިއެވެ.
"އެހެންވެ ކަނޑުއޮތްގިރި ބަންދުކުރަންޖެހުނީ. އަޅުގަނޑުމެން މިދަނީ އެޗްޑީސީއާ މުޢާމަލާތް ކުރަމުން،" ޝިޔާމް ވިދާޅުވިއެވެ.
