އަދާލަތު ޕާޓީގެ ތަޖުރިބާއަކީ ރާއްޖޭގެ ސިޔާސީ މަސްރަހަށް ވަރަށް މުހިންމުކަމެކަމުގައި އެމްޑީޕީގެ ޗެއަރޕާސަން ފައްޔާޒު އިސްލާއިލް ވިދާޅުވެއްޖެއެވެ.
އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވަނީ އަދާލަތު ޕާޓީގެ 19 ވަނަ އަހަރީ ދުވަހާ ގުޅިގެން އެ ޕާޓީގެ މުހިންމުކަން ފާހަގަކުރައްވާފައެވެ. "އެކްސް" ގައި ކުރެއްވި ޕޯސްޓެއްގައި ފައްޔާޒް ވިދާޅުވީ، އަދާލަތު ޕާޓީގެ ތަޖުރިބާ ރާއްޖޭގެ ސިޔާސީ މަސްރަހަށް ވަރަށް މުހިންމު ކަމަށެވެ.
ފައްޔާޒް އިތުރަށް ފާހަގަކުރެއްވި ގޮތުގައި، އިސްލާހީ ދަތުރުގައި އަދާލަތު ޕާޓީއަކީ އެމްޑީޕީގެ އަދި ދިވެހި ރައްޔިތުންގެ މުހިންމު ބައިވެރިއެކެވެ. "ވޭތުވެދިޔަ 10 ވަރަކަށް އަހަރުގެ އަޅުގަނޑުގެ ތަޖުރިބާގައި އަދާލަތު ޕާޓީއަކީ ސިޔާސީ މަސައްކަތުގައި އިތުބާރު ކުރެވޭ، ރައްޔިތުންގެ ލާބައާއި މަންފާއަށް ކުރެވުނު މަސައްކަތުގެ އިޚްލާޞްތެރި ބައިވެރިއެއް," އޭނާ ވިދާޅުވިއެވެ.
ފައްޔާޒް ވަނީ އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރު އިމްރާން އަބްދުﷲ އާއި ޕާޓީގެ އިލްމުވެރިންނަށާއި އެންމެހާ މެންބަރުންނަށް އަހަރީ ދުވަހުގެ ހެޔޮ އެދުމާއި ތަހުނިޔާ އަރިސްކުރައްވާފައެވެ.
ރާއްޖޭގައި މެދުނުކެނޑި ދެމިއޮތް ދެވަނައަށް އެންމެ ދޮށީ ސިޔާސީ ޕާޓީގެ ގޮތުގައި އަދާލަތު ޕާޓީ ފާހަގަކޮށްލެވެއެވެ. 2018 ވަނަ އަހަރުގެ ރިޔާސީ އިންތިޚާބާއި ނިމިދިޔަ ރިޔާސީ އިންތިޚާބުގައިވެސް އަދާލަތު ޕާޓީން ވަނީ އެމްޑީޕީއާ އެކު ކޯލިޝަން ހަދާފައެވެ. 2018 ގެ އިންތިޚާބުގައި އަދާލަތުގެ ލީޑަރު އިމްރާން ހުންނެވީ ޖަލުގައި ކަން ފާހަގަކޮށްލެވެއެވެ.
