މޫސުން ގޯސްވާނެކަމަށް ލަފާކޮށް، ހއ. ފެށިގެން އދ. ހަމައަށް ރީނދޫ ސަމާލުކަން ނެރެފައިވެއެވެ.
މޫސުމާބެހޭ ޤައުމީ މަރުކަޒު (މެޓް އޮފީސް) އިން މަޢުލޫމާތު ދީފައިވާ ގޮތުގައި، މި ސަމާލުކަން ދެމިއޮންނާނީ މިރޭ މެންދަމު 2:00 އާ ހަމައަށެވެ. މި މުއްދަތުގައި ގަޑިއަކު 25 އާއި 30 މޭލުގެ ބާރުމިނުގައި ވައި ޖެހޭނެކަމަށް ލަފާކުރެވެއެވެ. އަދި ވިއްސާރައިގެ ވިލާގަނޑުތަކުގައި ގަޑިއަކު 50 މޭލަށް ވައި ގަދަވެ، ކަނޑު ހާލަތު ވަރަށް ގޯސްވާނެކަމަށް ބެލެވެއެވެ.
މިއީ މުޅި ރާއްޖެއަށްވެސް މޫސުން ވަރަށް ގޯސްވެފައިވާ ދުވަސްވަރެކެވެ. ވޭތުވެދިޔަ ދެތިން ދުވަހު މާލެ ސަރަޙައްދަށްވެސް މޫސުން ވަރަށް ބޮޑަށް ގޯސްވެ، ފެންބޮޑުވުމުގެ ސަބަބުން ގެއްލުންތަކެއް ލިބިފައިވެއެވެ. މީގެ އިތުރުން، އުތުރާއި ދެކުނުގެ ބައެއް ރަށްތަކަށްވެސް މޫސުމުގެ ސަބަބުން ބޮޑެތި ގެއްލުންތަކެއް ވަނީ ލިބިފައެވެ.
