ޒަކާތު ފަންޑުން އެހީގެ ގޮތުގައި ގިނަ އަދަދެއް ޖުލައި މަހު ދޫކޮށްފައިވާ ކަމަށް މޯލްޑިވްސް ޒަކާތު ހައުސްގެ ތަފާސް ހިސާބުތަކުން ދައްކައެވެ. އޭގެ ތެރެއިން އެންމެ ބޮޑު އަދަދެއް ކެންސަރު ބަލީގެ މީހުންނަށް ދޫކޮށްފައިވާކަން ފާހަގަކުރެވެއެވެ.
ޒަކާތު ހައުސްގެ މަޢުލޫމާތު ދައްކާ ގޮތުގައި، ޖުލައި މަހު 140 މީހަކަށް ޖުމްލަ އެއް މިލިއަނަށްވުރެ ގިނަ ރުފިޔާ އެހީގެ ގޮތުގައި ދޫކޮށްފައިވެއެވެ. މީގެ ތެރޭގައި:
– ކެންސަރު ބަލީގެ މީހުންނަށް: 373,164 ރުފިޔާ
– ހިތުގެ އޮޕަރޭޝަންތަކަށް: 161,139 ރުފިޔާ
– ކިޑްނީ ބަލީގެ މީހުންނަށް: 93,291 ރުފިޔާ
– ސިކުނޑީގެ އޮޕަރޭޝަންތަކަށް: 67,848 ރުފިޔާ
– ޓްރާންސްޕްލާންޓްތަކަށް: 50,886 ރުފިޔާ
މިއާއެކު، މިދިޔަ މަހު މުދަލު ޒަކާތުގެ ގޮތުގައި 15 މިލިއަން ރުފިޔާ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ބަލައިގަނެފައިވާކަން އެ އިދާރާއިން ހާމަކޮށްފައިވެއެވެ.
އިސްލާމީ ޝަރީޢަތުގައި، މުދަލު ޒަކާތުގެ ނިޞާބު ހަމަވާ ފަރާތްތަކުން އެމީހުންގެ މުދަލާއި ފައިސާގެ 2.5 އިންސައްތަ ޒަކާތުގެ ގޮތުގައި ނެރެން ޖެހެއެވެ.
