ނ. މަނަދޫ ނައީމާ މޫސާ މަރާލި މައްސަލައިގައި އެކަން ރޭވިކަމަށް ތުހުމަތުކުރެވޭ ޙަސަން ފަވާޒުގެ މައްޗަށް ދައުލަތުން އުފުލާފަފައިވާ ތިން ދަޢުވާ އިއްވައިފިއެވެ. މި ދަޢުވާތަކަކީ:
1. ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށް
2. އަދުލު އިންޞާފު ޤާއިމުކުރުމަށް ހުރަސްއެޅުމުގެ ކުށް
3. މަރުވެފައިވާ މީހެއްގެ ހަށިގަނޑުގެ ބޭނުން ނަހަމަގޮތުގައި ހިފުމުގެ ކުށް
ނަމަވެސް، ޙަސަން ފަވާޒު ވަނީ މި ހުރިހާ ދަޢުވާއަކަށް އިންކާރުކޮށްފައެވެ. އޭނާގެ ދިފާޢީ ވަކީލު ބުނާގޮތުގައި، ނައީމާ މަރާލުމުގެ ޢަމަލު ރޭވުމުގައި ނުވަތަ ހެކި ފޮރުވުމުގައި ޙަސަން ފަވާޒު އެއްވެސް ދައުރެއް އަދާކޮށްފައެއް ނުވެއެވެ.
ދައުލަތުގެ ދަޢުވާގައި ބުނެފައިވާ ގޮތުގައި:
– ޙަސަން ފަވާޒު ވަނީ ނައީމާ މޫސާއަކީ ސިހުރުވެރިއެއްކަމަށް ބުނެ، އޭނާ މަރާލުމަށް އެހެން ބަޔަކަށް ވިސްނައިދީފައެވެ.
– 2023 އޭޕްރިލް 6 ވަނަ ދުވަހުގެ ދަންވަރު، ޙަސަން ފަވާޒު އޭނާގެ ކާރުގައި މީހުން ގެންގޮސް ނައީމާގެ ގެއަށް ވައްދާފައިވެއެވެ.
– ނައީމާއަށް ހަމަލާދެމުންދިޔައިރު، ޙަސަން ފަވާޒު ފޯނުން އިރުޝާދު ދެމުން ގެންދިޔައެވެ.
– މަރާލުމަށްފަހު، ޙަސަން ފަވާޒު އެމީހުން ގޮވައިގެން ގޮސް ހެކި ނައްތާލުމަށް އެހީތެރިވެދީ، އަދި މަސްތުވާތަކެތި ދީފައިވެއެވެ.
ދެން އޮންނަ ޝަރީޢަތުގެ އަޑުއެހުމުގައި ދެފަރާތުން ހެކި ހުށަހަޅާނެއެވެ. ދައުލަތުގެ ފަރާތުން ބައެއް ރިޕޯޓުތައް އޮގަސްޓު މަހުގެ ނިޔަލަށް ހުށަހެޅުމަށް ނިންމާފައިވާ ކަމަށް ބުނެފައިވެއެވެ.
ނައީމާ މަރުވެފައި އޮއްވާ ފެނުނީ 2023 ވަނަ އަހަރުގެ އޭޕްރީލް މަހުގެ ހަތްވަނަ ދުވަހު ނައީމާ ޑިއުޓީއަށް ނުގޮސްގެން އަދި އޭނާގެ ހަބަރެއް ނުވެގެން ފުލުހުންނަށް ރިޕޯޓްކުރުމުން ފުލުހުން އެ ދުވަހު ހަވީރު އެ ގެއަށް ގޮސް ނައީމާ ދިރިއުޅޭ ގޭގެ ކޮޓަރީގެ ދޮރު ވައްޓާލައިގެން ބެލިއިރު އެވެ. ފުލުހުން ގެއަށް ވަންއިރު ނައީމާ އޮތީ ޒަހަމްތަކަކާ އެކު ތަޅުންގަނޑު މަތީގައި މަރުވެފަ އެވެ. އަދި ހަށިގަނޑުގައި ގިނަ އަދަދަކަށް ޒަހަމު ހުރި ކަމަށް އެނގިފައިވެއެވެ.
