މޫސުން ގޯސްވުމާ ގުޅިގެން މެޓް އޮފީހުން މެދުރާއްޖެތެރެއާއި ދެކުނުގެ އަތޮޅުތަކަށް ވައިޓް އެލާޓެއް ނެރެފިއެވެ. މި އެލާޓް ދެމިއޮންނާނީ މިއަދު ހެނދުނު 7 ޖަހަންދެނެވެ.
މި މުއްދަތުގައި ބޯކޮށް ވާރޭވެހުމާއި ގުގުރުމުގެ ފުރުޞަތު އޮތްކަމަށް މެޓް އޮފީހުން ވަނީ އަންގާފައެވެ. އަދި ގަޑިއަކު 19 އާއި 24 މޭލުގެ ބާރުމިނުގައި ވައިޖެހުން އެކަށީގެންވާ ކަމަށާއި، ވިއްސާރައިގެ ތެރޭގައި ގަޑިއަކު 45 މޭލުގެ ބާރުމިނަށް ވައިގަދަވެދާނެ ކަމަށްވެސް ލަފާކޮށްފައިވެއެވެ. މީގެ އިތުރުން ކަނޑުތައްވެސް ގަދަވާނެ ކަމަށް ބެލެވެއެވެ.
ހުޅަނގު މޫސުމުގެ ވިއްސާރަ ރާއްޖެއަށް ކުރަމުންދާއިރު، އެކި ސަރަހައްދުތަކަށް މޫސުމީ އެލާޓްތައް ނެރެމުންދެއެވެ. އަދި ކަނޑުދަތުރުފަތުރު ކުރާ ފަރާތްތަކަށް މޫސުމަށް ސަމާލުވުމަށް ކަމާބެހޭ އިދާރާތަކުން އިލްތިމާސްކޮށްފައިވެއެވެ.
