އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު، މިއަދުގެ ސަރުކާރުން ޤާނޫނުއަސާސީ އިޞްލާޙުކޮށް ރައްޔިތުންގެ މަޖިލީހުގެ ދައުރާއި ރިޔާސީ ދައުރުގެ މުއްދަތު އިތުރުކުރުމަށް ވިސްނަމުންދާ ކަމަށް ތުހުމަތުކުރައްވައިފިއެވެ.
އެމްޑީޕީގެ ޤައުމީ މަޖިލިސް ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ، ސަރުކާރުން ރާއްޖޭގެ ޚާރިޖީ ސިޔާސަތު ރަނގަޅުކަމަށް ދައްކަން މަސައްކަތްކުރި ނަމަވެސް، ޙަޤީޤަތަކީ އެއީ ނޫން ކަމަށެވެ. އިންޑިއާއާއެކު އޮތް ޒަމާންވީ ގުޅުމަށް ބުރޫއަރާފައިވާ ކަމަށާއި، އޭގެ ސަބަބުން ދިވެހި ރައްޔިތުންނަށް ލިބުނު ގެއްލުން އެތައް ގުނައެއް އިތުރުކަމަށް ޝާހިދު ފާހަގަކުރެއްވިއެވެ.
މީގެ އިތުރުން، ރާއްޖޭގެ ފަތުރުވެރިކަމުގެ މާކެޓް ބޮޑުތަނުން ދަށްވެފައިވާ ކަމަށާއި، ރިސޯޓުތަކުގެ އޮކިއުޕަންސީ ދަށްވެ، އިންޑިއާގެ މާކެޓް ކުރިއަށްވުރެ ބޮޑުތަނުން ދަށްވެފައިވާ ކަމަށްވެސް ޝާހިދު ވިދާޅުވިއެވެ.
ޝާހިދު ވިދާޅުވީ، މިއަދު ޤާނޫނުއަސާސީއަށް 16 އަހަރު ފުރުން ފާހަގަކުރާއިރު ދިވެހި ޤައުމު ވަނީ އަނެއްކާވެސް ފަހަތަށް ސޮއްސާލާފައި ކަމަށެވެ. ރާއްޖޭގެ މުޅި ނިޒާމު އެއްކޮށް ތަޣައްޔަރުވެ، ބާރުވެރިކަމާއި އަޅުވެތިކަމުގެ އިންތިހާއަށް މިސްރާބު ޖަހާފައިވާ ކަމަށް ޝާހިދު ފާހަގަކުރެއްވިއެވެ.
މި ސަރުކާރަކީ އަނިޔާވެރި ސަރުކާރެއްކަމަށް ސިފަކުރައްވައި، ރައީސުލްޖުމްހޫރިއްޔާގެ ވިސްނުން ހުރީ ރައްޔިތުންގެ ބަސްބުނުމުގެ ޙައްޤު ނިގުޅައިގަތުމަށް ކަމަށް ޝާހިދު ވިދާޅުވިއެވެ. މުއައްސަސާތަކުގެ މައްޗަށް ބާރު ފޯރުވައި، ނިކަމެތިކަމުގެ ތެރެއަށް ވައްޓާލާ މަންޒަރު ފެންނަން ފަށާފައިވާ ކަމަށްވެސް އެމަނިކުފާނު ފާހަގަކުރެއްވިއެވެ.
ޝާހިދު އިތުރަށް ވިދާޅުވީ، މި ސަރުކާރުން ބޭނުންވަނީ ވެރިކަމާއި މަޖިލީހުގެ ދައުރުގެ މުއްދަތު އިތުރުކުރުމަށް ކަމަށާއި، މިނިވަން މުއައްސަސާތަކަށް ސިޔާސީ ނުފޫޒު ފޯރުވައި، މެންބަރުންގެ އަދަދު މަދުކުރުމަށް ކަމަށެވެ.
