ރައްޔިތުންގެ މަޖިލިސް އިންތިޚާބާއި ރިޔާސީ އިންތިޚާބު އެކީ ބޭއްވުމަކީ އެހާ ކަމުދާކަމެއް ނޫންކަމުގައި އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެއްޖެއެވެ.

ރޭ ރާއްޖެ ޓީވީގައި ވާހަކަ ދައްކަވަމުން ފައްޔާޒު ވިދާޅުވީ ކައުންސިލް އިންތިޚާބާއި ރިޔާސީ އިންތިޚާބު އެކީ ބޭއްވިޔަސް މައްސަލައެއް ނެތްކަމަށާއި، އޭގެ ސަބަބަކީ ކައުންސިލަރުންނަކީވެސް ދައުލަތް ހިންގުމުގައި ޝާމިލްވާ ބަޔަކަށްވުން ކަމުގައެވެ. އަދި އޭނާ ވިދާޅުވީ ކައުންސިލްތަކަށް އަންނަ ބަޔަކީވެސް ސަރުކާރާއެކު މަސައްކަތް ކުރެވޭނެ އެއް ޕާޓީއަކަށް ވުމަށްޓަކައި ރައްޔިތުން ފަހަރެއްގައި އެމަގުން ވިސްނުންވެސް ގެންގުޅެފާނެ ކަމުގައެވެ.

އެހެންނަމަވެސް ރައްޔިތުންގެ މަޖިލިހަކީ ސަރުކާރު ޒިންމާދާރު ކުރުމުގެ މަސްއޫލިއްޔަތުވެސް އުފުލަންޖެހޭ މުވައްސަސާއަކަށް ވާތީ، މަޖިލިސް އިންތިޚާބު ރިޔާސީ އިންތިޚާބާއެކު ބޭއްވުން އެއީ އެންމެ ރަގަޅު ވިސްނުމެއްކަމަށް ދެކެވަޑައިނުގަންނަވާކަމަށްވެސް ފައްޔާޒު ވިދާޅުވިއެވެ.

އެހެނެއް ނޫން، ރިޔާސީ އިންތިހާބާ އެއްކޮށް ކައުންސިލް އިންތިހާބު ބޭއްވުން މާބޮޑު މައްސަލައެއް ނެތް. އެއީ އެއްގޮތަކުން ވެއްޖިއްޔާމު ކައުންސިލްތަކަށް އަންނަ ބަޔަކީވެސް ސަރުކާރާއެކު މަސައްކަތް ކުރެވޭނެ އެއް ޕާޓީއަކަށް ވުމަށްޓަކައި ރައްޔިތުން ފަހަރެއްގައި ވިސްނާފަ އެއީ ކައުންސިލަރުންނަކީ ވެސް ހަގީގަތުގައި ދައުލަތް ހިންގުމުގަ ހިމެނޭ ބައެއް. ރަށުގެ ކަންކަން ހިންގާ މީހުން. އެހެން ނަމަވެސް މަޖިލިސް އަކީ ޖަވާބުދާރީ ކުރަން އަންނަ ބައެއް، އެ ދެބައި އެއްކުރުމަކީ އަޅުގަނޑަށް އެހާ ކަމުދާ ކަމެއް ނޫން.

ފައްޔާޒް ވިދާޅުވި އެވެ.

މިހަފްތާގެ އާދީއްތަ ދުވަހުގެ ރޭ ޕީއެންސީގެ ޖަގަހާގައި ބޭއްވުނު ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވެފައިވަނީ، ރައްޔިތުންނަށް އެންމެ ފައިދާ ކުރާނީ ރިޔާސީ އިންތިޚާބާއި މަޖިލިސް އޮންތިޚާބު އެކީ ބޭއްވުމުން ކަމުގައެވެ. އަދި ރައީސް މުއިއްޒު ވިދާޅުވީ އެބަދަލު ގެނައުމަށް ގާނޫނު އަސާސީއަށް މިއަހަރު އިސްލާހު ހުށަހަޅުއްވާނެ ކަމުގައެވެ.

ޕީއެންސީގެ ޖަގަހާގައި ބޭއްވުނު އެޖަލްސާގައި ވާހަކަ ދައްކވަމުން ރައީސް މުއިއްޒު ވިދާޅުވީ މިބަދަލު ގާނޫނު އަސާސީއަށް ގެނައުމަށްޓަކާ ރައްޔިތުންގެ ފެންނަ ނުފެންނަ ވޯޓެއް ނަގަންޖެހޭނެ ކަމަށާއި، މިބަދަލު ގެނެވޭނީ ރައްޔިތުންގެ ރުހުން އޮވެގެން ކަމުގައެވެ.

އެގޮތުން ރައީސް ވިދާޅުވީ މަޖިލިސް އިންތިޚާބަށް 120 މިލިއަން ރުފިޔާ ޚަރަދުވާއިރު ރިޔާސީ އިންތިޚާބަށް 180 މިލިއަން ރުފިޔާ ޚަރަދުވާ ކަމުގައެެވެ. އެހެންކަމުން މި ދެއިންތިޚާބު އެކީ ބޭއްވިއްޖެނަމަ، ދައުލަތަށް ވަރަށް ގިނަ ފައިސާ ސަލާމަތް ކުރެވޭނެކަމަށް ރައީސް ވިދާޅުވިއެވެ. ރައީސް މުއިއްޒު ވިދާޅުވީ، މި ބަދަލުތައް މިއަހަރު ގާނޫނު އަސާސީއަށާއި ގާނޫނުތަކަށް ގެންނަވާނެ ކަމުގައެވެ.