މަޖިލިހާއި ކައުންސިލްތަކުގެ އަދަދު މަދުކުރުމުގެ ކުރިން ރައްޔިތުންގެ ހިޔާލާއި މަޝްވަރާ ފުޅާ ދާއިރާއެއްގައި ހޯދަން ޖެހޭ ކަމުގައި އެމްޑީޕީގެ ޗެއަރޕާސަން ފައްޔާޒު އިސްމައިލް ވިދާޅުވެއްޖެއެވެ.
ކައުންސިލްތަކާއި ރައްޔިތުންގެ މަޖިލިހުގެ ސައިޒް ކުޑަކުރައްވަން ހުށްހަޅުއްވާނެކަމަށް ރައީސް މުއިއްޒު ރޭ ވިދާޅުވެފައިވަނިކޮށް، ފައްޔާޒު މިއަދު ކުރެއްވި އެކްސް ޕޯސްޓެއްގައި ވިދާޅުވީ ސިސްޓަމަށް ބަދަލުތަކެއް އަންނަން ޖެހޭ ކަމަށާއި އެހެންނަމަވެސް، ކައުންސިލްގެ އަދަދު މަދުކުރުމާއި މަޖިލިސް އަދަދު މަދުކުރުމުގެ ކުރިން ރައްޔިތުންގެ ހިޔާލާއި މަޝްވަރާ ފުޅާ ދާއިރާއެއްގައި ހޯދަން ޖެހޭ ކަމުގައެވެ.
ނަމަވެސް ދެބޯގެރި ދުއްވުމުގެ ބަދަލުގައި މިހާރުން މިހާރަށް ކުރެވެން ހުރި ކަންކަން ކުރުން މުހިންމު. މާލިއްޔަތު ރަނގަޅު ކަމަށް ވަޒީރުން ވިދާޅުވާއިރު އާންމު ރައްޔިތުން ހިތި ބޭސް ބޯންޖެހޭ ވާހަކަ ދެއްކީމައި މާލިއްޔަތު އަދި އިގްތިސާދު ރަނގަޅަށް އޮތަސް ރައްޔިތުން އަދި އިންވެސްޓަރުންނާއި ފައިނޭންސަރުންގެ އިތުބާރު ގެއްލި ނުބައި ދިމާލަކަށް ގޮސްދާނެ.
ފައްޔާޒުގެ އެކްސް ޕޯސްޓުގައި ވިދާޅުވެފައި ވެއެވެ.
ފައްޔާޒު އިތުރަށް ވިދާޅުވީ ގެންނަށް ހުށަހަޅާފައި ހުރި ބަދަލުތަކުގައި އިހްލާސްތެރިކަމެއް ހުރިކަމަކަށް ނުފެނޭކަމަށާއި، ވިޔަފާރިތަކާއި ކިޔަވަން ބޭރުގައި ތިބި ދަރިވަރުންނަށް ދޭން ޖެހޭ ފައިސާ ދޭނެ ގޮތެއްގެ ވާހަކަ ސަރުކާރުން ހާމަކުރަން ޖެހޭ ކަމުގައެވެ.
އަދި މިކަންކަން ހުރީ ނުވެކަން ފާހަގަ ކުރައްވަމުން ފައްޔާޒު ވިދާޅުވީ، އިތުބާރު ހޯދުމަށް ވައުދުވެފައިވާ ގޮތަށް ކަންކަން އަދި ހާލަތު އޮތްގޮތް މުޅިން ސާފުވާ ގޮތަށް ހާމަކުރަން ޖެހޭ ކަމުގައެވެ.
އަދި ސިޔާސީ މުވައްޒަފުން ކިހާވަރެއްތޯ ސުވާލު ކުރައްވަމުން، ފައްޔާޒު ވިދާޅުވީ ރައްރަށުގެ ކައުންސިލަރުން މަދުކުރުމުގެކުރިން ސިޔާސީ މުވައްޒަފުން ވައުދާއެއްގޮތަށް މަދުކޮށް، އެކަންކަމާއި ގުޅުންހުރި މައުލޫމާތު ހާމަކުރުމަކީ އެއްވެސް ވަރަކަށް އުނދަގޫކަމެއް ނޫންކަމުގައެވެ.
ފައްޔާޒު ވިދާޅުވީ އެމްޑީޕީ އިން ރައްޔިތުން ބަލައިގަންނާނެ ހަރުދަނާ ބަދަލުތަކަކަށް މަރުހަބާ ކިޔާނެ ކަމަށެވެ. އެހެންނަމަވެސް މާލީ ހާލަތު ‘ވާނުވާ’ ގަ ބާއްވައިގެން ގައުމަށް ލިބޭނެ އެއްވެސް ކުރިއެރުމެއް ނެތްކަމުގައިވެސް އޭނާ ވިދާޅުވިއެވެ.
