ހަގީގީ ހާދިސާތަކަކަށް ބިނާކޮށް ސެޓާން ސްޓޫޑިއޯ އާއި ކިޑް ޕްރޮޑަކްޝަނުން ގެނެސްދޭ ފިލްމު "ކަމަނާ" ގައި އެކްޓަރު ޔޫސުފް ޝަފީއު (ޔޫއްޕެ) ފިލްމުގައި ފެންނާނެ ގޮތުގެ ފަސްޓްލުކް ޕޯސްޓަރެއް ދައްކާލައިފި އެވެ.
އާންމު ކޮށްފައިވާ ސޯޝަލް މީޑިއާގެ ޕޯސްޓަރު ތަކުން ހާމަވާ ގޮތުގައި މި ފިލްމް ގައި ޔޫއްޕެ ފެނިގެންދާނީ ހައިދަރު ކިޔާ ކެރެކްޓާ އަކުންނެވެ. މި ޕޯސްޓަރުގައި ފެންނަ ގޮތުން ޔޫއްޕެ ހުންނަނީ ވަރަށް ސާދާކޮށް ހެދުން އަޅައިގެންނެވެ.
View this post on Instagram
ގެވެށި އަނިޔާގެ ޝިކާރައަކަށްވި ޒުވާން އަންހެނެއްގެ ހަޔާތުގެ މައްޗަށް ލިޔެފައިވާ ހަގީގީ ވާހަކައަކަށް އުފައްދާފައިވާ މި ފިލްމު އޮލިމްޕަސް ގައި އެޅުވުމަށް ހަމަޖެހިފައިވަނީ އަންނަ އޯގަސްޓް މަހުގައިއެވެ. "ކަމަނާ" އަކީ މަހުދީގެ ސްކްރީންޕްލޭއަކަށް ހުސައިން ޑައިރެކްޓްކުރި ތިން ވަނަ ފިލްމެވެ. އަނެއް ދެ ފިލްމަކީ 2011 ގެ "ސަޒާ" އާއި 2013 ގެ "ދިލަކަނި" އެވެ.
އޮގަސްޓް 27 ގައި ޕްރީމިއާކުރަން ހަމަޖެހިފައިވާ "ކަމަނާ" ގެ މައިގަނޑު ކާސްޓްގައި ހިމެނެނީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިމިނަތު ރަޝްފާ (އާޝާ) އެވެ. އިތުރު ކާސްޓުންގެ ތެރޭގައި މުހައްމަދު މަނިކު، އަހުމަދު ނިމާލު، މުހައްމަދ ރަޝީދު (ދަރާ) އަދި ނަތާޝާ ޖަލީލު ހިމެނެ އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމަކީ "ހައްދު" އާއި "ވިޝްކާ" ފަދަ މަގުބޫލު ފިލްމުތަކުގެ ސްކްރީން ރައިޓަރު މަހުދީ އަހުމަދު އަހުމަދުގެ ސްކްރީންޕްލޭއަށް ހުސައިން މުނައްވަރު (ހުސައިން ކިޑް) ޑައިރެކްޓްކޮށްފައިވާ އަސަރު ގަދަ ލޯބީގެ ވާހަކައެއްގެ ތެރެއިން ގެވެށިއަނިޔާގެ ހިތްދަތި ހާދިސާތަކެއް ދައްކުވައި ދޭނެ ފިލްމެކެވެ.
