ދައުލަތުގެ މިނިވަން މުވައްސަސާތަކުގެ މެމްބަރުންގެ އަދަދު ގިނަ ކަމަށާއި، އަދި ކޮންމެހެން ބޭނުންނުވާ ކޮމިޝަންތައް އުވާލާ، ކޮމިޝަންތަކުގެ މެމްބަރުންގެ އަދަދު މަދުކޮށް، ދައުލަތުގެ މިނިވަން މުވައްސަސާތަކަށް އިސްލާހީ ބަދަލު ގެންނަވާނެ ކަމުގައި ރައީސް މުއިއްޒު ވިދާޅުވެއްޖެއެވެ.

މިރޭ ޕީއެންސީގެ ޖަގަހައިގައި ބޭއްވި ހަރުގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ދައުލަތުގެ ގިނަ މިނިވަން މުވައްސަސާތަކަކީ އެމުވައްސަސާތަކުން ކުރާންޖެހޭ މަސައްކަތްތައް ކުރުމަށް މިޙާރުތިބިހާ ގިނަ މެމްބަރުން ބޭނުން ނުވާނެކަމަށެވެ. އެހެންކަމުން، މިހާރުގެ މިނިވަން މުވައްސަސާތަކުގެ ސައިޒު ކުޑަވާންޖެހޭކަމުގައި ރައީސް މުއިއްޒު ވިދާޅުވިއެވެ.

އަދި ރައީސް މުއިއްޒު ވިދާޅުވީ، މިހާރު އުފައްދާފައިވާ ކޮމިޝަންތަކުގެ ތެރެއިން، ކޮންމެހެން ބޭނުންނުވާ ކޮމިޝަންތައްވެސް އުވާލައްވަން ގާނޫނުތަކަށް އިސްލާހު ހުށަހޅުއްވާނެ ކަމުގައެވެ.

މިރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރައްޔިތުންގެ މަޖިލިސް އިންތިޚާބާއި އަދި ރިޔާސީ އިންތިޚާބު އެކީ ބެއްވުމަށް ގާނޫނު އަސާސީއަށް ބަދަލު ގެނައުމަށްޓަކާ ރައްޔިތުންގެ ފެންނަ ނުފެންނަ ވޯޓެއް ނަގަންޖެހޭނެ ކަމަށާއި، މިބަދަލު ގެނެވޭނީ ރައްޔިތުންގެ ރުހުން އޮވެގެން ކަމުގައެވެ. އަދި މި ބަދަލު ގެނައުމަށްވެސް ގާނޫނު އަސާސީއަށް އިސްލާހު ހުށަހަޅުއްވާނެކަމަށްވެސް ރައީސް ވިދާޅުވިއެވެ.

އެގޮތުނަ ރައީސް ވިދާޅުވީ މަޖިލިސް އިންތިޚާބަށް 120 މިލިއަން ރުފިޔާ ޚަރަދުވާއިރު ރިޔާސީ އިންތިޚާބަށް 180 މިލިއަން ރުފިޔާ ޚަރަދުވާ ކަމުގައެެވެ. އެގޮތުން މި ދެއިންތިޚާބު އެކީ ބޭއްވިއްޖެނަމަ، ދައުލަތަށް ވަރަށް ގިނަ ފައިސާ ސަލާމަތް ކުރެވޭނެކަމަށް ރައީސް ވިދާޅުވިއެވެ. ރައީސް މުއިއްޒު ވިދާޅުވީ، މި ބަދަލުތައް މިއަހަރު ގާނޫނު އަސާސީއަށާއި ގާނޫނުތަކަށް ގެންނަވާނެ ކަމުގައެވެ.

ތަފްސީލް އަންނަނީ..