ތުރުކީއަށް ރާއްޖެއިން ކަނޑައަޅާ ސަފީރުކަމަށް ޗީފް އޮފް ޑިފެންސް ފޯސްގެ މަގާމުގައި ކުރިން ހުންނެވި ލެފްޓިނެންޓް ޖެނެރަލް (ރިޓަޔާޑް) އަބްދުއްރަހީމް އަބްދުއްލަތީފް އައްޔަނުކުރަން ރައްޔިތުންގެ މަޖިލީހުން މިއަދު ރުހުން ދީފިއެވެ.
މީގެ އިތުރުން މިހާރު ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައިވާ ސަފީރު މުހައްމަދު ޠާހާ، ޕާކިސްތާނު ސަފީރުކަމަށް ބަދަލުކުރުމަށް ވެސް މަޖިލީހުން ވަނީ ރުހުން ދީފައެވެ.
ފޮރިން ސާވިސް ގާނޫނުގެ ދަށުން ރާއްޖެއިން މި ދެ ގައުމަށް ސަފީރުން ކަނޑައެޅުމަށް، ރައްޔިތުންގެ މަޖިލީހުގެ މަޝްވަރާ ހޯދުމަށް ރައީސް ޑރ. މުހައްމަދު މުއިއްޒު ވަނީ މިދިޔަ މަހުގެ 19ވަނަ ދުވަހު މަޖިލީހަށް އެ މައްސަލަ ހުށަހަޅުއްވާފައެވެ.
އެއަށްފަހު އެ މައްސަލަ މަޖިލީހުގެ ޚާރިޖީ ގުޅުންތަކުގެ ކޮމިޓީއަށް ފޮނުވާފައި ވަނީ މި މަހުގެ ހަތަރު ވަނަ ދުވަހެވެ. ކޮމިޓީން ނިންމީ އެ ދެ ފަރާތަކީ ވެސް އެ މަގާމުތަކަށް އެކަށީގެންވާ ދެ ފަރާތް ކަމަށެވެ.
މިއަދުގެ ޖަލްސާއަށް އެ މައްސަލަ އެޖެންޑާކޮށް ނެގި ވޯޓުގައި 82 މެންބަރުންގެ ވޯޓާއެކު އަބްދުއްރަހީމް، ތުރުކީއަށް ރާއްޖެއިން ކަނޑައަޅާ ސަފީރުކަމަށް އައްޔަނުކުރަން ވަނީ ރުހުން ދީފައެވެ.
އަދި މިހާރު ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައިވާ ސަފީރުކަމުން ޕާކިސްތާނު ސަފީރުކަމަށް ބަދަލުކުރުމަށް ތާހާއަށް ވަނީ 82 މެންބަރުން ވަނީ ވޯޓު ދީފައެވެ.
މި ދެ ފަރާތަށް ރުހުން ނުދިނުމަށް އެއްވެސް މެންބަރަކު ވޯޓު ދީފައެއް ނުވެއެވެ.
މިދިޔަ ސަރުކާރުގައި ވައިސް ޗީފް އޮފް ޑިފެންސް ފޯސްގެ މަގާމުގައި ހުންނެވި އަބްދުއްރަހީމް ސިފައިންގެ ޗީފަކަށް އައްޔަން ކުރެއްވީ ރައީސް މުއިއްޒު ވެރިކަމުގެ ހުވާކުރެއްވުމަށް ފަހު، މިދިޔަ އަހަރުގެ ނޮވެމްބަރު 17 ވަނަ ދުވަހެވެ.
ނަމަވެސް އަބްދުއްރަހީމް ސިފައިންގެ ޚިދުމަތާ ދުރަށް ވަޑައިގެންފައި ވަނީ 39 އަހަރުގެ ޚިދުމަތަށްފަހު، އޭނާގެ އުމުރުފުޅުން 60 އަހަރުވުމުންނެވެ.
ސިފައިންގެ ގާނޫނު ބުނާގޮތުން، އެ ވަޒީފާގައި ހުރެވޭނެ އެންމެ ދޮށީ އުމުރަކީ 60 އަހަރެވެ.
ޕާކިސްތާނު ސަފީރުކަމަށް ބަދަލުކުރެއްވުމަށް ރައީސް ހުށަހެޅުއްވި ޠާހާ، އެންމެ ފުރަތަމަ ސައުދީ ސަފީރުކަމަށް އައްޔަނުކުރެއްވުމަށް މަޖިލީހުން ރުހުންދީފައި ވަނީ މިދިޔަ މަހުގެ ހަވަނަ ދުވަހެވެ.
އޭނާއަކީ ނިމިދިޔަ މަޖިލިސް އިންތިޚާބުގައި ޕީއެންސީގެ ޕްރައިމަރީގައި ވާދަކުރައްވައި، ނާކާމިޔާބުވެވަޑައިގެންނެވި ބޭފުޅެކެވެ. އޭނާ ވާދަކުރެއްވީ ހޮޅުދޫ ދާއިރާއަށެވެ.
