ދައުލަތުގެ ހަރަދުތައް ކުޑަ ކުރުމަށް ރައްޔިތުންގެ މަޖިލިހުގެ މެމްބަރުންގެ މުސާރަ އާއި އިނާޔަތްތައް ކުޑަ ކުރަން ތާއީދު ކުރައްވާ ކަމަށް މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހިމް (ކުޑޫ) ވިދާޅުވެއްޖެއެވެ.
ކުޑޫ އެކްސްގައި ކުރެއްވި ޕޯސްޓެއްގައި މަޖިލިހުގައި ހިމެނިވަޑައިގަންނަވާ އެމްޑީޕީގެ 12 މެމްބަރުންގެ ތެރޭގައި ހިމެނިވަޑައިގަންނަވާ ކުޑޫ ވިދާޅުވީ ދައުލަތުގެ ހަޙަރަދުތައް ކުޑަ ކުރަން, މަޖިލިސް މެމްބަރެއްގެ ގޮތުން ލިބިވަޑައިގަންނަވާ މުސާރައިގެ އިތުރުން އެހެނިހެން އިނާޔަތްތައް ކުޑަކުރަން ތައްޔާރަށް ހުންނެވި ކަމަށެވެ.
ހަދަރުތައް ކުޑަކުރަން ސަރުކާރުން މިހާރު ފިޔަވަޅުތަކެއް އަޅަމުން އަންނަ އިރު، މަޖިލީހުގެ އެކިއެކި މެމްބަރުން ގެންދަވަނީ އެކަމުގައި މެމްބަރުން ވެސް ނަމޫނާ ދައްކަވަން އެދިވަޑައިގަންނަވަމުންނެވެ. ބައެއް ޕީއެންސީގެ މެމްބަރުން ވެސް ވަނީ މުސާރަތައް ކުޑަކޮށް، މެމްބަރުން މެޑިކަލް އިންޝުއަރެންސް ވެސް ކަނޑާލަން އަންގަވައިފައެވެ.
ހިތަދޫ މެދު ދާއިރާގެ މެންބަރު އަހުމަދު އަޒާން ވެސް ވަނީ ހަރަދުތައް ކުޑަކުރުމަށްޓަކައި މެންބަރުންގެ ހެލްތު އިންޝުއަރެންސް ކަނޑާލަން ޖެހޭ ކަމަށް ވެސް ވިދާޅުވެފައެވެ.
ރާއްޖޭގެ އިގްތިސާދީ ހާލަތު ވަރަށް ބޮޑަށް ގޯސްވެފައިވާ އިރު، މި ހާލަތުން އަރައިގަތުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސިޔާސީ މަގާމުތައް މަދު ކުރުމާއި ސަރުކާރުގެ ކުންފުނިތައް ރިފޯމް ކުރުމާއި ރިކަރަންޓު ހަރަދު ކުޑަ ކުރުން ފަދަ ކަންކަން ހިމެނެ އެވެ.
ރައީސް ޑރ. މުހައްމަދު މުއިއްޒު ވަނީ ހަރަދުތައް ކުޑަކުރުމުގެ ގޮތުން މިނިވަން ދުވަހުގެ ހަރަކާތްތައް ނުބޭއްވުމަށް އަންގަވައިފަ އެވެ. އަދި މިނިވަން ދުވަސް ފާހަގަ ކުރުމަށް ހަމައެކަނި ޖަލްސާއެއް ބޭއްވުމަށް ވެސް އެމަނިކުފާނު ވަނީ އަންގަވައިފަ އެވެ.
މަޖިލިހުގެ މެމްބަރުންނަށް މަހެއްގެ މައްޗަށް 62،000ރ. އަދި ކޮމިޓީ އެލަވަންސްގެ ގޮތުގައި 20،000ރ. އާ އެކު މަހެއްގެ މައްޗަށް 82،500ރ. ލިބިވަޑައިގެންނެވި އެވެ. ނަވާރަ ވަނަ މަޖިލިހުގައި މެމްބަރުންގެ މުސާރަ ބޮޑު ކުރަން ކޮމިޓީ މަރުހަލާގައި ނިންމި އެވެ. އެކަމަކު، އާންމުންގެ ފާޑު ކިއުންތަކާ ގުޅިގެން އެ މަސައްކަތް މިހާރު ވަނީ މަޑުޖައްސާލައިފައެވެ.
