ހަގީގީ ހާދިސާތަކަކަށް ބިނާކޮށް ސެޓާން ސްޓޫޑިއޯ އާއި ކިޑް ޕްރޮޑަކްޝަނުން ގެނެސްދޭ ފިލްމު "ކަމަނާ" އޮލިމްޕަހަށް ގެންނަން ތާވަލު ކޮށްފައިވާ ދުވަސް އިއުލާން ކޮށްފިއެވެ. މި ފިލްމް ރިލީޒް ކުރުމަށް ތާވަލު ކޮށްފައިވަނީ އަންނަ އޯގަސްޓް މަހުގެ 27 ވަނަ ދުވަހުގައިއެވެ.
އިއްޔެ އެ ފިލްމްގެ ޕޯސްޓަރު ދައްކައިލި އިރުގައި ވަނީ ފިލްމް ރިލީޒް ކުރާ ދުވަސް ވެސް އިއުލާން ކޮށްފައިއެވެ. މި ފިލްމްގެ ޕޯސްޓަރުން ފިލްމްގައި ތަފާތު ކަމެއް ފެންނާނެ ކަމުގެ ހުރިހާ ކުލަވަރެއް ވަނީ އެކުލެވިފައިއެވެ.
ގެވެށި އަނިޔާގެ ޝިކާރައަކަށްވި ޒުވާން އަންހެނެއްގެ ހަޔާތުގެ މައްޗަށް ލިޔެފައިވާ ހަގީގީ ވާހަކައަކަށް އުފައްދާފައިވާ މި ފިލްމު އޮލިމްޕަސް ގައި އެޅުވުމަށް ހަމަޖެހިފައިވަނީ އަންނަ އޯގަސްޓް މަހުގައިއެވެ. "ކަމަނާ" އަކީ މަހުދީގެ ސްކްރީންޕްލޭއަކަށް ހުސައިން ޑައިރެކްޓްކުރި ތިން ވަނަ ފިލްމެވެ. އަނެއް ދެ ފިލްމަކީ 2011 ގެ "ސަޒާ" އާއި 2013 ގެ "ދިލަކަނި" އެވެ.
View this post on Instagram
"ކަމަނާ" ގެ މައިގަނޑު ކާސްޓްގައި ހިމެނެނީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިމިނަތު ރަޝްފާ (އާޝާ) އެވެ. އިތުރު ކާސްޓުންގެ ތެރޭގައި މުހައްމަދު މަނިކު، އަހުމަދު ނިމާލު، މުހައްމަދ ރަޝީދު (ދަރާ) އަދި ނަތާޝާ ޖަލީލު ހިމެނެ އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމަކީ "ހައްދު" އާއި "ވިޝްކާ" ފަދަ މަގުބޫލު ފިލްމުތަކުގެ ސްކްރީން ރައިޓަރު މަހުދީ އަހުމަދު އަހުމަދުގެ ސްކްރީންޕްލޭއަށް ހުސައިން މުނައްވަރު (ހުސައިން ކިޑް) ޑައިރެކްޓްކޮށްފައިވާ އަސަރު ގަދަ ލޯބީގެ ވާހަކައެއްގެ ތެރެއިން ގެވެށިއަނިޔާގެ ހިތްދަތި ހާދިސާތަކެއް ދައްކުވައި ދޭނެ ފިލްމެކެވެ.
