ރައްޔިތުންގެ މަޖިލިހުގެ މެމްބަރުންގެ މުސާރަ ކުޑަކުރަން ތާއީދު ކުރައްވާ ކަމުގައި މައްޗަންގޮޅި ދެކުނު ދާއިރާގެ ޕީއެންސީގެ މެމްބަރު މުސްތަފާ ހުސެއިން ވިދާޅުވެއްޖެއެވެ.
މިއީ ވިހި ވަނަ މަޖިލިހުގައި ހިމެނިވަޑައިގަންނަވާ 93 މެމްބަރުންގެ ތެރެއިން މުސާރަ ކުޑަކުރުމަށް ގޮވާލެއްވި ފުރަތަމަ މެމްބަރެވެ. މީގެކުރިން ޕީއެންސީގެ ބައެއް މެމްބަރުން ވަނީ މެމްބަރުންނަށް ލިބިވަޑައިގަންނަވާ މެޑިކަލް އިންޝުއަރެންސް މެދުކަނޑާލަން ވެސް ގޮވާލައްވައިފައެވެ.
މުސްތަފާ "އެކްސް" ގައި ކުރެއްވި ޕޯސްޓެއްގައި ވިދާޅުވީ ގައުމަށް ދިމާވެފައިވާ މި ދަތި ދަނޑިވަޅުގައި މެމްބަރުންގެ މުސާރަ ކުޑަކޮށް، ރައްޔިތުންނަށް ނަމޫނާ ދައްކަވަން ހުށަހަޅުއްވާ ކަމަށެވެ. އަދި އެކަމާ ގުޅޭ ގޮތުން ނަގާ ވޯޓުގައި ފެހި ބަޓަން އަށް ފިއްތާލެއްވުމަށް ތައްޔާރަށް ހުންނެވި ކަމުގައި މުސްތަފާ ވިދާޅުވިއެވެ.
ރާއްޖޭގެ އިގްތިސާދީ ހާލަތު ވަރަށް ބޮޑަށް ގޯސްވެފައިވާ އިރު، މި ހާލަތުން އަރައިގަތުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސިޔާސީ މަގާމުތައް މަދު ކުރުމާއި ސަރުކާރުގެ ކުންފުނިތައް ރިފޯމް ކުރުމާއި ރިކަރަންޓު ހަރަދު ކުޑަ ކުރުން ފަދަ ކަންކަން ހިމެނެއެވެ.
ރައީސް ޑރ. މުހައްމަދު މުއިއްޒު ވަނީ ހަރަދުތައް ކުޑަކުރުމުގެ ގޮތުން މިނިވަން ދުވަހުގެ ހަރަކާތްތައް ނުބޭއްވުމަށް އަންގަވައިފައެވެ. އަދި މިނިވަން ދުވަސް ފާހަގަ ކުރުމަށް ހަމައެކަނި ޖަލްސާއެއް ބޭއްވުމަށް ވެސް އެމަނިކުފާނު ވަނީ އަންގަވައިފައެވެ.
ސަރުކާރުގެ ހަރަދުތައް ކުޑަކޮށް އަދި އާމްދަނީ އިތުރުކުރުމުގެ ފިޔަވަޅުތައް ކުރިއަށް އޮތް ދުވަސްތަކުގައި އަޅަން ފިނޭންސް މިނިސްޓްރީން ނިންމިއިރު، އަޅާނެ ފިޔަވަޅުތައް ވެސް މިނިސްޓްރީން ވަނީ އިއުލާންކޮށްފައެވެ.
