ސަރުކާރުން ރައްޔިތުންގެ މަޖިލިހަށް ފޮނުވާފައިވާ ދަރަންޏާ ބެހޭ ބިލް އަވަސް ކުރަން އަންނަ އާދިއްތަ ދުވަހު މަޖިލިހުގެ ޖަލްސާއެއް ބޭއްވުމަށް ނިންމައިފިއެވެ.
އާދިއްތަ ދުވަހުގެ އެޖެންޑާގައި އޮތީ ސަރުކާރުގެ ފަރާތުން ފުނަދޫ ދާއިރާގެ ޕީއެންސީގެ މެމްބަރު މުހައްމަދު މަމްދޫހު ހުށަހެޅުއްވި ބިލަށް ބަހުސް ކުރެއްވުމެވެ. ދަރަންޏާ ބެހޭ ބިލަކީ މަޖިލީހުގެ މި ދައުރުގައި ސަރުކާރުން ހުށަހަޅަން ނިންމާފައިވާ 37 ބިލުތަކުގެ ތެރޭގައި ހިމެނޭ ބިލެކެވެ.
އެޖެންޑާގައި ދެން ހިމެނޭ ކަންކަމުގެ ތެރޭގައި ތުރުކީއަށް ރާއްޖެއިން ކަނޑައަޅާ ސަފީރު ހަމަޖެއްސުމާއި ސައުދީ އަރަބިއްޔާއަށް ކަނޑައަޅާފައި ހުންނަވާ ސަފީރު ޕާކިސްތާނުގެ ސަފީރަކަށް ބަދަލު ކުރުމަށް ރައީސް ޑރ. މުހައްމަދު މުއިއްޒު ފޮނުއްވާފައިވާ މައްސަލަ ހާރިޖީ ގުޅުންތަކުގެ ކޮމެޓީއިން ދިރާސާކޮށް ނިންމިގޮތުގެ ރިޕޯޓު ހުށަހެޅުން ހިމެނެއެވެ.
އަދި 'ސަމާއޯ އެގްރިމަންޓު’ގައި ރާއްޖެއިން ސޮއިކުރުމާ ގުޅޭގޮތުން މަޖިލީހުގެ ރުހުން ހޯދުމަށް ރައީސް ފޮނުވައްވާފައިވާ މައްސަލަ ހާރިޖީ ގުޅުންތަކުގެ ކޮމެޓީން ދިރާސާކޮށް ނިންމިގޮތުގެ ރިޕޯޓު ހުށަހެޅުން ހިމެނެއެވެ.
މަޖިލިހުން އާންމުކޮށް ޖަލްސާތައް ބާއްވަނީ ހޯމަ، އަންގާރަ އަދި ބުދަ ދުވަހުއެވެ. އެކަމަކު މުހިންމު ކަމެއް ނިންމަން ބޭނުންވެއްޖެ ނަމަ، އެހެން ދުވަސްތަކުގައި ޖަލްސާތައް ބާއްވާފައި އެބަހުއްޓެވެ.
