ރައްޔިތުންގެ މަޖިލީހުގެ މެމްބަރުންނާއި މެމްބަރުންގެ އާއިލާއަށް އާސިއާން ގައުމުތަކުން ލިބޭ މެޑިކަލް އިންޝުއަރެންސް މެދުކަނޑާލަންޖެހޭ ކަމަށް ރައްޔިތުން މަޖިލީހުގެ ހިތަދޫ މެދު ދާއިރާގެ މެންބަރު އަހްމަދު އަޒާން މިއަދު ވިދާޅުވެއްޖެއެވެ.
އަޒާން ފޭސްބުކްގައި ކުރެއްވި ޕޯސްޓެއްގައި ވިދާޅުވީ ދައުލަތުގެ މާލީ ހާލަތު ރަނގަޅު ކުރުމަށް ރައީސް ޑރ.މުހައްމަދު މުއިއްޒުގެ ސަރުކާރުން ދަނީ ހަރަދު ކުޑަކުރަމުން ކަމަށެވެ. އަދި މިކަމުގައި ރައްޔިތުންގެ މަޖިލިހުގެ މެމްބަރުން ވެސް ނަމޫނާ ދައްކަވަން ޖެހިވަޑައިގަންނަވާ ކަމަށް އަޒާން ވިދާޅުވިއެވެ.
އެގޮތުން ރައްޔިތުންގެ މަޖިލީހުގެ މެންބަރުންނާއި، އާއިލާގެ ބޭފުޅުންނަށް އާސިއާން ގައުމުތަކުން ލިބެން އޮންނަ މެޑިކަލް އިންޝުއަރެންސް މެދުކަނޑާލަންޖެހޭ ކަމަށް އަޒާން ވިދާޅުވިއެވެ.
އަޒާން ވިދާޅުވީ، އާންމު ރައްޔިތުންނަށް ނުލިބޭ މެޑިކަލް އިންޝުއަރެންސެއް ދައުލަތުން ހަރަދުކޮށްގެން މެމްބަރުންނަށް ލިބިވަޑައިގަންނަވަން ނުޖެހޭ ކަމަށެވެ.
މަޖިލިހުގެ މެމްބަރުންނަށް ލިބިވަޑައިގަންނަވާ އިންޝުއަރެންސް ކަނޑާލަން ތާއީދު ކުރައްވާ ކަމަށް މަޖިލިހުގެ ބާރަށު ދާއިރާގެ މެމްބަރު އަދި ޕީއެންސީގެ އެންމެ ސީނިއާ އެއް މެމްބަރު އިބްރާހިމް ޝުޖާއު ވެސް މިއަދު ވަނީ ވިދާޅުވެފައެވެ.
ޝުޖާއު ވިދާޅުވި، ދައުލަތުގެ ހަރަދު ކުޑަކުރުމަށް ރައީސް ޑރ. މުހައްމަދު މުއިއްޒު ފައްޓަވާފައިވާ ގައުމީ މަސައްކަތަށް އެއްބާރުލުން ދެއްވުމުގެ ގޮތުން މަޖިލިސް މެމްބަރުންގެ އިންޝުއަރެންސް މިހާރުން މިހާރަށް ކަނޑާލައި ދިވެހި ރައްޔިތުންނަށް ލިބޭ އާސަންދަ އެކަނި ލިބޭ ގޮތަށް ބަދަލު ކުރަައްވަން ފުރިހަމަ އަށް ތާއީދު ކުރައްވާ ކަމަށެވެ.
