ސިއްޙި ނިޒާމާމެދު ރައްޔިތުންގެ ނުތަނަވަސްކަން އެބައޮތް ކަމަށާއި، ރައީސް މުޢިއްޒުގެ ޒައާމަތުގައި މި ނިޒާމް ރަނގަޅުވެ، ތަރައްގީވެގެން ދާނެ ކަމުގައި ދިއްދޫ ދާއިރާގެ މެމްބަރު އަބުދުއްލަތީފް މުހައްމަދު ވިދާޅުވެއްޖެއެވެ.

ލަތީފް މިހެން ވިދާޅުވީ، އިއްޔެ ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުންނެވެ.  ސަރުކާރުގެ ފަރާތުން، ހެންވޭރު ދެކުނު ދާއިރާގެ މެންބަރު ޙުސައިން އިމްރާން ލަޠީފް ހުށަހަޅުއްވާފައިވާ، ޞިއްޙީ ޚިދުމަތް ދިނުމުގެ ޤާނޫނަށް އިޞްލާޙު ގެނައުމުގެ ބިލުގެ އިބްތިދާއީ ބަހުސްގައި ވާހަކަ ދައްކަވަމުން ލަތީފް ވިދާޅުވި ރާއްޖޭގެ ސިއްޙީ ނިޒާމުގެ ބަލިކަށިކަން ދިވެހި ރައްޔިތުންނަށް އެނގޭ ކަމަށާއި، ރާއްޖޭގަ އޮތް ސިއްޙީ ނިޒާމަކީ ދިވެހި ރައްޔިތުން އެހާ ހިންހަމަޖެހޭ ނިޒާމެއް ނޫން ކަމުގައެވެ.

’އަޅުގަނޑުގެ ދާއިރާ ދިއްދޫގެ 5 ހާސް އާބާދީ، އަޅުގަނޑުގެ އަތޮޅުހއ. އަތޮޅު ނުވަތަ ތިލަދުންމަތީ އުތުރުބުރީގެ ގާތްގަނޑަކަށް، 22، 27 ހާސް ރައްޔިތުން އެބަތިބި، ސިއްހީ ނިޒާމް އޮތީ ވަރަށް ދަށްކޮށް، އަތޮޅު ހޮސްޕިޓަލެއް ހުރޭ، ހެލްތު ޕޯސްޓަަކަށް ހުރިއިރުވެސް، ސިއްހީ މަރުކަޒަކަށް ހުރިއިރު ވެސް ހަމައެތަން، އެ އިމާރާތް، އެ ޚިދުމަތްދޭން ތިބި މީހުން، ބަދަލެއް ނާދޭ.

ދާއިރާގެ ރައްޔިތުން ސިއްޙީ ނިޒާމާއި ގުޅޭގޮތުން ކުރާ ޝަކުވާތަކަށް އަލި އަލުއްވާލައްވަމުން ލަތީފް ވިދާޅުވިއެވެ.

ލަތީފް ވިދާޅުވީ ރައްޔިތުން އާދޭސް ކުރަމުންދަނީ ޑޮކްޓަރުން އިތުރުކޮށްދޭން ކަމަށާއި، ނަރުހުން އިތުރުކޮށްދީ ޚިދުމަތްތައް ރަނގަޅުކޮށްދީ ފުޅާކޮށްދީ، ރައްޔިތުން އެދެމުންދަނީ ސިއްޙީ ފެންވަރަު ރަގަޅު ކޮށްދިނުމަށް ކަމުގައެވެ.

22، 27 ހާސް ރައްޔިތުން ޚިދުމަތް ހޯދަން އޮތް އަތޮޅު ހޮސްޕިޓަލްގެ ވާހަކަ މިދައްކަނީ، ސިއްހީ ނިޒާމް އޮތީ އެހާ ބަލިކަށިކޮށް.

ލަތީފް ވިދާޅުވިއެވެ.

ލަތީފް އިތުރަށް ވިދާޅުވީ ސިއްޙީ ދާއިރާއާއި ގުޅުންހުރި ކަންބޮޑުވުންތަކަކަކީ ހުރިހާ ސަރުކާރެއްގައިވެސް އޮތް މައްސަލައެއް ކަމަށާއި، ނަރުހުން ނެތިގެން، ޑޮކްޓަރުން ނެތިގެން، ބެސް ނުލިބިގެން ކޮންމެސް ހައްލެއް ހޯދައިދިނުމަށް އެދި ދުވާލަކަށް 15 ނުވަތަ 20 އަށް ކޯލް ރައްޔިތުންގެ ކިބައިން ނާންނަ ހަމަ އެންމެ ދުވަހެއްނުދާކަމަށެވެ.

އެހެންނަމަވެސް ސިއްޙީ ދާއިރާގެ ބަޖެޓަކީ ކޮންމެ އަހަރަކުވެސް 5 ބިލިއަން ރުފިޔާގެ ބޮޑު ބަޖެޓެއް ދައުލަތުން ޚާއްސަކުރާ ނިޒާމެއްކަމަށް ވިދާޅުވެ އެއީ ދިވެހި ކޮންމެ ރައްޔިތެއްގެ ބޮލަށްވެސް 150،000 ރުފިޔާގެ ދެހޭވަރުގެ އަދަދެއްކަން ލަތީފް ފާހަގަ ކުރެއްވިއެވެ. އަދި އެވަރުގެ އަދަދެއް ދައުލަތުގެ ބަޖެޓުން ހޭދަކުރަމުންދާއިރުވެސް، އެ އަދަދާއި އެއްވަރުގެ ޚިދުމަތްތަކެއް ރައްޔިތުންނަށް ލިބެމުންދޭތޯ ލަތީފް ސުވާލު ކުރެއްވިއެވެ.

’މިއީ އެހާ ބަލިކަށި ނިޒާމެއް، ރައްޔިތުން ހިތްހަމަނުޖެހޭ، ނުތަނަވަސްކަން އޮތް ނިޒާމެއް، ބޭނުމެއް ނިޒާމެއް، ކިރިޔާ ކަމެއްވާއިރަށް ދުއްވައިގަންނަން މިޖެހެނީ އިންޑިއާ އަށް ފަރުވާ ހޯދަން، ދެން ގުޅަންފެށީ މެންބަރުންނަށް ބޭރަށް ދެވޭތޯ، އާސަންދަ ލިބޭތޯ، އެންސްޕާ ލިބޭތޯ މެންބަރުންގެ ޖީބުން އެއްޗެއް ލިބޭތޯ'.

ލަތީފް އިތުރަށް ވިދާޅުވިއެވެ.

ލަތީފް ވިދާޅުވީ އެހެންނަމަވެސް ރައީސް މުއިއްޒުގެ ވެރިކަމުގައި ރާއްޖޭގެ ސިއްޙީ ނިޒާމު ތަރައްގީވެގެންދާނެކަމާމެދު ޝައްކު ނުކުރައްވާކަމުގައެވެ.