އޮސްޓްރޭލިއާގެ އިދިކޮޅު ލިބަރަލް ޕާޓީގެ އަހަރީ ކޮންފަރެންސުގައި ބައިވެރިވަޑައިގަތުމަށް އިދިކޮޅު އެމްޑީޕީގެ ޗެއަރޕާސް ފައްޔާޒު އިސްމާއިލް އޮސްޓްރޭލިއާއަށް ވަޑައިގެންފިއެވެ.
އޮސްޓްރޭލިއާގެ ސިޑްނީގައި ބޭއްވުމަށް ހަމަޖެހިފައިވާ މިކޮންފަރެންސަށް ފައްޔާ ވަޑައިގެންނެވީ އޮސްޓްރޭލިއާގެ އިދިކޮޅު ލިބަރަލް ޕާޓީގެ އަހަރީ ކޮންފަރެންސުގައި ބައިވެރިވުމަށް ލިބިވަޑައިގެންނެވި ދައުވަތަކަށެވެ.
ފައްޔާޒުގެ 4 ދުވަހުގެ މި ދަތުރުފުޅުގައި އޮސްޓްރޭލިއާގެ ލިބަރަލް ޕާޓީގެ އެކި މަޝްވަރާތަކުގައި ބައިވެރިވެވަޑައިގެން، ތަޖުރިބާ ހިއްސާކުރުމަށް ވަނީ ހަމަޖެހިފައެވެ.
1944 ވަނަ އަހަރު އުފެއްދި ލިބަރަލް ޕާޓީއަކީ އޮސްޓްރޭލިއާގެ މިހާރުގެ އިދިކޮޅު ޕާޓީއެވެ. އެޕާޓީއަކީ ސެންޓަރ ރައިޓް ޕާޓީއެކެވެ. އެޕާޓީ އިދިކޮޅު ޕާޓީއެއްގެ ގޮތުގައި މަސައްކަތް ކުރާން ފެށީ 2022 ވަނަ އަހަރުގެ ފެޑެރަލް އިލެކްޝަންއިން އެޕާޓީ ބަލިވުމަށްފަހުއެވެ.
ބައެއް މީޑިއާތަކަށް މައުލޫމާތު ދެއްވަމުން ފައްޔާޒު ވިދާޅުވީ އިދިކޮޅު ޕާޓީއެއްގެ ގޮތުގައި ލިބަރަލް ޕާޓީ ކުރަމުންދާ ތަޖުރިބާ ގޮތާއި އަދި އެޕާޓީގެ ކެމްޕޭން ސްޓްރެޓަޖީތައް މި ދަތުރުން އެގިގެންދާނެއެވެ. އަދި އޭގެ ސަބަބުން އެމްޑީޕީން ހިންގާ ހަރަކާތްތަކަށް ކުރިއެރުން އަންނާނެ ކަމަށްވެސް ފައްޔާޒު ވިދާޅުވެފައި ވެއެވެ.
އެ ދަތުރުގައި އެމްޑީޕީ ތަމްސީލް ކުރެއްވުމަށް ފައްޔާޒްގެ އިތުރުން ކުރީގެ އެންވަޔަރަމަންޓް މިނިސްޓަރު އައިމިނަތު ޝައުނާ އަދި ގައުމީ މަޖިލިސް މެންބަރު މުހައްމަދު ޖައިޝް ބައިވެރިވެވަޑައިގަންނާވާނެ އެވެ.
