ވިހި ވަނަ ރައްޔިތުންގެ މަޖިލިސް ވެގެން ދާނީ ރައީސް ޑރ. މުހައްމަދު މުއިއްޒުގެ މަސައްކަތްޕުޅާ ފިޔަވަޅު ހަމަކުރާ މަޖިލީހަކަށް ކަމުގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެއެވެ.
މަޖިލިހުގެ ރިޔާސަތާ ފުރަތަމަ ފަހަރަށް ހަވާލުވެވަޑައިގަތުމަށް ފަހު އަބްދުއްރަހީމް ވިދާޅުވީ 20 ވަނަ މަޖިލީސް އެކުލަވާލެވުނީ ގައުމަށް މުހިންމު ދަނޑިވަޅެއްގައި ކަމަށާއި މި މަގާމަށް އެމަނިކުފާނުގެ ނަން ހުށަހެޅުއްވި ކަމަށްޓަކައި ރައީސް ޑރ. މުހައްމަދު މުއިއްޒަށް ހިތުގެ ފުން މިނުން ޝުކުރު ދަންނަވާ ކަމަށެވެ. އަދި މި މަގާމަށް އިންތިހާބުކޮށް ދެއްވުމަށްޓަކައި ވޯޓު ދެއްވި ހުރިހާ މެމްބަރުންނަށް ވެސް ޝުކުރު އަދާކުރައްވާ ކަމުގައި އަބްދުއްރަހީމް ވިދާޅުވިއެވެ.
"އިގުތިސާދު ފުޅާކުރުން އާ މަސައްކަތްތަކާއި ފަންނުތަކާއި ވިޔަފާރިތައް އުފަންކުރުން ފައިސާއާއި މާލީ ފުދުންތެރިކަން އިތުރު ކުރެވޭނެ ގޮތްތައް ހޯދުން، އުމްރާނީ ތަރައްގީގެ އާ ހަރުފަތްތަކެއް ރާއްޖެއަށް ތައާރަފު ކުރަމުން ގެންދިއުން، ވީދެމުންދާ ދިވެހިންގެ އިޖުތިމާއީ ފޭރާން އަލުން ވިޔެ އާކުރުން، މަސްތުވާތަކެތީގެ ވަބާއާ ވަރުގަދަ ހަނގުރާމައެއް ކުރުން ނުގަވާއިދުން ބިދޭސީން ރާއްޖެއަށް ވަންނަ ދޮރުތައް ބަންދުކުރުން، ގާނޫނުގެ ވެރިކަން ނެހެއްޓުން، ޝަރުއީ ދާއިރާގެ މިނިވަންކަން ކަށަވަރުކުރުން، މަޖިލީހުގެ އަބުރާއި ކަރާމާތް ހިފެހެއްޓުން. މިއީ ކުރިއަށް އޮތް ދުވަސްތަކުގައި މަޖިލިސް ތެރޭގައި މަޝްވަރާކޮށް ބަހުސްކޮށް ސަރުކާރާއެކު މަސައްކަތްކޮށް ގޮތް ނިންމަންޖެހޭ ކަންކަން،" އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ މަޖިލީހުގެ މަސައްކަތްތަކުގެ ތެރޭގައި އާ ގާނޫނުތައް ތައާރަފުކޮށް މިހާރު ހުރި ގާނޫނުތައް އަލުން ބަލައި، އިސްލާހުކޮށް ވަގުތާ ފައިހަމަ ނުވާ ގާނޫނުތައް އުވާލަންޖެހޭ ކަމަށެވެ. އަދި މިހާރު އަމަލު ކުރަމުންދާ ގަވާއިދުތައް ވެސް ގާތުން ބަލައި، އެއީ ގާނޫނުން ބާރު ލިބިގެން ގާނޫނީ ދާއިރާގެ ތެރެއިން ހަދައިގެން ހިންގާ ގަވާއިދުތަކެއްކަން ކަށަވަރުކޮށް، ގާނޫނުން ބޭރުން ހުރި ގަވާއިދުތައް ގާނޫނުގެ ތެރެއަށް ވެއްދުން ނުވަތަ ދޫކޮށްލަންޖެހޭ ކަމަށް ވެސް ވިދާޅުވިއެވެ.
"މަޖިލީހުގައި ދެކެވޭ ވާހަކަތަކާއި ކުރެވޭ ބަހުސްތަކާއި ހިނގާ މަސައްކަތުގައި ތަފާތު ހިޔާލުތަކަށާއި ތަފާތު ވިސްނުންތަކަށާއި ތަފާތު ނަޒަރިއްޔާތުތަކަށް ފުރުސަތު ލިބެންވާނެ، އެކަމަށް ޖާގަ އޮންނަންވާނެ، ނަމަވެސް އެ ކަންކަން ހިނގަންވާނީ މަޖިލީހުގެ ކަރާމާތާއި ގަދަރު ހިފެހެއްޓޭ ގޮތަށް، މަޖިލީހުގެ ހަމަތަކާއި ސުލޫކީ މިންގަނޑުގެ ތެރެއިން މަޖިލީހުގެ މަސައްކަތްތަަކާމެދު ދިވެހިން ފަހުރުވެރިވާނެ ގޮތަކަށް، މި މަޖިލީހަށް ދިވެހިންގެ ހިތްތަކުގައި އޮތް ގަދަރާއި މަގާމު އުފުލޭފަދަ ގޮތަކަށް. ދާއިރާގެ ރައްޔިތުން ހިތާ ރޫހުން މަސައްކަތް ބަލައިގަންނާނެ ގޮތަކަށް،" އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ރައީސް ޑރ. މުއިއްޒުގެ ޒައާމަތުގައި އާ ސިޔާސަތުތަކާ އެކީގައި ނުކުންނެވީ އިންގިލާބީ ހެޔޮ ބަދަލެއް ރާއްޖެ އަށް ގެނެސްދެއްވުމުގެ އަޒުމުގައި ކަމަށެވެ. އެހެންކަމުން މި މަޖިލިސް ވެގެންދާނީ އެމަނިކުފާނުގެ މަސައްކަތްތަކާ ފިޔަވަޅު ހަމަކޮށްގެން ހިންގަން ވާނެ އަދި އެއްބާރުލުން ދޭނެ މަޖިލީހަކަށް ކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ 20 ރައްޔިތުންގެ މަޖިލިސް އެކުލެވިގެން މިދަނީ ގައުމަށް ވަރަށް މުހިންމު ދަނޑިވަޅެއްގައި ކަމަށާއި މަޖިލީހުގައި ކުރާ ބަހުސްތަކުގައި ތަފާތު ހިޔާލުތަކަށް ޖާގަ އޮންނަންވާނެ ކަމަށް ގަބޫލު ކުރައްވާ ކަމަށެވެ.
"އެހެންކަމުން މިތަނުގައި ދެކެވޭ ވާހަކަތަކާ، ކުރެވޭ ބަހުސްތަކާ ހިނގާ މަސައްކަތުގައި ތަފާތު ހިޔާލުތަކަށާއި ތަފާތު ވިސްނުންތަކަށާއި ތަފާތު ނަޒަރިއްޔާތުތަކަށް ފުރުސަތު ލިބެންވާނެ ކަމަށާއި، އެކަންކަމަށް ޖާގަ އޮންނަންވާނެ ކަމަށް އަޅުގަނޑު ގަބޫލުކުރަން." އަބްދުއްރަހީމް ވިދާޅުވިއެވެ.
