ގައުމީ ޗާޕުހާނާއެއް އުފެއްދުމުގެ މަސައްކަތް ވަރަށް ބާރަށް ކުރިޔަށްދާކަމުގައި ދިވެހި ބަހާއި ތާރީހާއި ސަގާފަތާބެހޭ މިނިސްޓަރު އާދަމް ނަސީރު ވިދާޅުވެއްޖެއެވެ.
ދިވެހި ބަހާއި ތާރީހާއި ސަގާފަތާބެހޭ މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާދަމް ނަސީރު ވިދާޅުވީ، ގައުމީ ޗާޕުހާނާ އުފެއްދުމުގެ އެންމެ މުހިއްމު ބޭނުމަކީ ދިވެހި ގައުމިއްޔަތާއި ތަރިކައާއި ތާރީހާއި ދިވެހީންގެ އަމިއްލަވަންތަކަމާއި ގުޅިފައިވާ އިލްމުތައް، އަދި އެ ކަންކަމާ ގުޅިފައިވާ މައުލޫމާތުތައް އެއްކުރައްވާ ބޭފުޅުންނަށް އެ ބޭފުޅުންގެ ފޮތްތައް އޭގެ ފުރަތަމަ 100 އެއްހައި ކޮޕީ ނުވަތަ 50 އެއްހައި ކޮޕީ ދައުލަތުން ޗާޕުކޮށްދިނުން ކަމަށެވެ.
ދިވެހިރާއްޖޭގައި ގައުމީ ޗާޕުހާނާ އަކާއި ގައުމީ ތަރިކައަާ ބެހޭ ކޮލެޖެއް ގާއިމްކުރުމަކީ ރައީސް މުހައްމަދު މުއިއްޒުގެ ހަފްތާ 14 ގައި ހިމަނުއްވާފައިވާ މުހިއްމު ވައުދުފުޅެކެވެ.
މިއަދުގެ ނޫސްވެރިންގެ ބައްދަލުވުމުގައި އާދަމް ނަސީރު ވިދާޅުވެފައިވަނީ ދިވެހި ގައުމީ ތަރިކައިގެ ކޮލެޖް ގާއިމްކުރުމުގެ ކަރުދާހީ ހުރިހާ މަސައްކަތެއްވެސް ނިމިފައިވާކަމަށާއި މިހާރު ކުރެވެމުންދާ މަސައްކަތަކީ އެ ކޮލެޖު ގާއިމް ކުރުމަށް ހަމަޖައްސަންޖެހޭ އިދާރީ މަސައްކަތްތައް ކުރުން ކަމުގައެވެ. އެގޮތުން އޭނާ ވިދާޅުވީ މިހާރު ކުރެވެމުންދާ މަސައްކަތްތަކަކީ އެ ކޮލެޖަށް ބޭނުންވާ އިދާރީ ބޭފުޅުންގެ ނަންފުޅުތައް ފޮނުވުމުގެ މަސައްކަތް ކަމުގައެވެ.
